Reformalar jaýapkershiligin moınyma alamyn, bolashaqta da daıynmyn – Qasym-Jomart Toqaev
ASTANA. KAZINFORM – Halyqaralyq sarapshylar Qazaqstannyń «ortasha tabystar qaqpanyna» túsip qalǵanyn durys baıqap otyr. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.
– Álemdik tájirıbege qarasaq, reformalar qolǵa alynǵan kezde jurtshylyq ony kóp jaǵdaıda túsinbeı, qabyldamaı jatady. Ondaı kezde barlyq jaýapkershilikti arqalaı alatyn kóshbasshynyń róli aıryqsha. Men Memleket basshysy retinde osyndaı jaýapkershilikti óz moınyma alamyn. Bolashaqta da buǵan daıynmyn. Menimen birge jumys istep jatqan azamattar muny jaqsy biledi. Árıne, bul kedergisi kóp, qıyn jol ekenin túsinemin. Tarıhta reformatorlardan góri basqynshylar men popýlısterdiń aty kóbirek qalyp jatady. Biraq, Qazaqstan úshin basqa jol joq. Biz bir jerde toqtap qalmaı, alǵa qaraı nyq qadam basý úshin reformalardy qalaıda júzege asyrýymyz kerek, - dedi Qasym-Jomart Toqaev.
Memleket basshysy azamattarymyzǵa zııany tımeýi úshin qys mezgilinde tarıfterdi ósirý ákimshilik tásilder arqyly ýaqytsha toqtatylǵanyn aıtty.
- Sonymen birge, Úkimetke bıýdjet qarjysyn barynsha tıimdi paıdalaný mindeti júkteldi. Ekonomıkaǵa aqshany orynsyz quıa berýge bolmaıdy, bul ınflıatsııany kúsheıtip jiberedi. Qatań bıýdjettik tártip kerek. Qarjy resýrstary memleketke qajetti jobalarǵa ǵana jumsalýǵa tıis. Byltyr qarasha aıynda Úkimet, Ulttyq bank, Qarjy naryǵyn retteý jáne damytý agenttigi birlesip, úsh jyldyq baǵdarlama qabyldady. Qujat azamattardyń ál-aýqatyn jaqsartý úshin ınflıatsııany tómendetýge arnalǵan, - dedi Prezıdent.
Qasym-Jomart Toqaev halyqaralyq sarapshylar Qazaqstannyń «ortasha tabystar qaqpanyna» túsip qalǵanyn durys baıqap otyrǵanyna nazar aýdartty.
- Ashyǵyn aıtaıyn, bul – ekonomıka týraly oqýlyqtan alynǵan jalpylama uǵym emes, kún saıyn kóptegen azamatymyzdyń basynan ótip jatqan ómir shyndyǵy. Jurt tabys taýyp jatyr, tipti, jaqsy tabys tabatyndar da bar. Biraq, onyń bárin ınflıatsııa jep qoıady nemese ıpoteka tóleý, balalardy oqytý, ata-anaǵa kómektesý sııaqty kúndelikti tirlikke jumsalyp, joq bolyp ketedi. Aýyryp qalý nemese jumystan aıyrylý sekildi kez kelgen kóldeneń kedergi turmystaǵy turaqtylyqty buzyp jiberýi múmkin, - dedi Memleket basshysy.
Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.