Reformalar, ınnovatsııalar jáne tutastyq: Erlan Qarın 2025 jyl Qazaqstan úshin qalaı bolǵanyn baǵalady
ASTANA. KAZINFORM – 2025 jyl Qazaqstan úshin prezıdenttik reformalardy ınstıtýtsıonaldyq turǵydan ornyqtyrý kezeńi boldy. Bul týraly Memlekettik keńesshi Erlan Qarın jelidegi paraqshasynda málimdedi.
- Іshki saıasatty júıeleý, ortaq qundylyqtardy qalyptastyrý baǵytyndaǵy jumys jalǵasyn tapty. Salanyń negizgi qaǵıdattary men baǵyttaryn aıqyndaıtyn jeke qujattyń qabyldanýy memlekettik saıasattyń tıimdiligi men maqsatty sıpatyn arttyrýda mańyzdy qadamǵa aınaldy.
Іshki saıası jumys áleýmettik-ekonomıkalyq ózgeristermen qatar júrgizildi. Syrtqy ahýaldyń kúrdeli bolýyna qaramastan, ekonomıka turaqty ósim kórsetti, áleýmettik, ınjenerlik jáne jol ınfraqurylymyn qarqyndy ári aýqymdy jańǵyrtý jumystary jalǵasty. Osy oraıda quqyqtyq tártipti nyǵaıtý, eńbek qundylyqtaryn ilgeriletý, jumysshy mamandyqtarynyń mártebesin arttyrý Memleket basshysy aıqyndaǵan kún tártibiniń mańyzdy quramdas bóligine aınaldy. Mundaı tásil qoǵamdyq turaqtylyqtyń negizin qalyptastyryp, júrgizilip jatqan memlekettik saıasatqa degen senimdi kúsheıtedi, - delingen jazbada.
Sondaı-aq ol 2025 jyly memlekettiń aýqymdy tsıfrlandyrýǵa jáne jasandy ıntellekt tehnologııalaryn jappaı engizýge baǵyttalǵan uzaq merzimdi vektoryn qalyptastyrýymen erekshelengenin atap ótti.
- Tsıfrlyq transformatsııa óz aldyna bólek maqsat retinde emes, ekonomıkanyń ártúrli salasyndaǵy tıimdilikti arttyrýdyń, memlekettik qyzmetterdiń sapasyn jaqsartýdyń, eldiń jalpy básekege qabilettiligin kúsheıtýdiń júıeli quraly retinde qarastyrylyp otyr.
Sonymen qatar 2025 jyl elimizde saıası reformalardyń jańa kezeńiniń bastalýymen este qaldy. Memleket basshysynyń birpalataly parlamentke kóshý jónindegi bastamasy saıası ınstıtýttardyń rólin odan ári kúsheıtip, saıası dıalogty damytý baǵytyn aıqyndaı tústi, - degen Erlan Qarın.
Onyń paıymynsha, jalpy alǵanda, 2025 jyldy jekelegen reformalar men baǵdarlamalardan Qazaqstannyń tutas ári úılesimdi damý modeline sapaly kóshý kezeńi retinde sıpattaýǵa bolady. Prezıdent Qasym-Jomart Toqaevtyń saıası baǵdarynyń kezeń-kezeńimen júzege asyrylýy elimizdi órkendeýdiń jańa ári ornyqty kúre jolyna shyǵarady.
- Instıtýtsıonaldyq ózgeristerdiń, ekonomıkalyq ósimniń jáne jańa qoǵamdyq etıkanyń úılesimi memlekettiń aldaǵy turaqty ilgerileýine berik negiz qalaıdy, - deıdi Memlekettik keńesshi.
Aıta keteıik, Erlan Qarın áskerı-patrıottyq tárbıe jónindegi jumysty kúsheıtýdi tapsyrdy.