Reformalar baǵdarlamasy aıqyn ári dáıekti demokratııalyq damýdy kózdeıdi - Ásemgúl Áshimova
Kásiporyn basshysynyń aıtýynsha, Ult kóshbasshysynyń Úndeýi bul eldiń múddesi men zamannyń talabyn, urpaqtyń bolashaǵyn oılaǵan baılam. Prezıdenttiń áleýmettik-ekonomıkalyq úrdisterin retteýdegi birshama ókilettikterin Úkimet pen atqarýshy organdarǵa berýi óte durys qadam. Bul jaǵdaıda bıliktegilerdiń jaýapkershiligi artady. Jaýapkershilik bolǵan jerde jumys alǵa baspaq.
«Árıne, bılik tarmaqtary arasyndaǵy qarym-qatynasty teńgerimdi etý kúrdeli mindet. Bul reformanyń aıasynda Úkimetti jasaqtaý barysynda Parlamenttiń róli kúsheımekshi. Sóıtip, Parlament saılaýynda jeńgen partııa Úkimet quramyn irikteýge yqpal etip, mınıstrler kabınetiniń jaýapkershiligin arttyrady. Bıliktiń zań shyǵarýshy tarmaǵynyń atqarýshy bılikke baqylaýyn kúsheıtedi. Osy eki baǵyt jaýapkershilik pen kásibılikti arttyrý arqyly memlekettik basqarý tıimdiligin kúsheıtedi», dedi Ásemgúl Áshimova.
Sonymen qatar, ol bul reformanyń negizgi máni Elbasy óziniń birqatar ókilettigin Parlament pen Úkimetke berýinde, bılik ókilettikterin sarabdaldyqpen qaıta bólýde jáne tutastaı saıası júıeni demokratııalandyrýda bolyp otyrǵanyn erekshe atap ótýde.
«Elbasy óz úndeýinde: «Biz qanshalyqty jetistikterimizdi aıtqanmen, álem kóz aldymyzda ózgerip jatyr. Qoǵamdyq úderisterdiń jyldamdyǵy men kúrdeliligi Qazaqstanda da baıqalady. Búginniń ózinde keleshek aldymyzǵa mindetti túrde kóldeneń tartatyn jahandyq jáne óńirlik syn-qaterlerge qalaı qarsy turatynymyzdy oılastyrýǵa tıispiz»,- dep atap ótti. Al, Memleket basshysy bolsa, syrtqy saıasatqa, ulttyq qaýipsizdik pen eldiń qorǵanys qabiletine kúsh-jigerin jumyldyrady. Úkimet pen Premer-Mınıstr aktileri is-áreketiniń kúshin joıý nemese toqtatý quqyǵynan bas tarta alady. Bul atqarýshy memlekettik organdar men onyń basshylarynyń jaýapkershiligin arttyryp, tıisti ókilettikter beredi. Úkimet múshelerine Parlament palatalary tarapynan senimsizdik bildirý tártibin ońaılatqan jón. Bul bıliktiń zań shyǵarýshy tarmaǵynyń atqarýshy tarmaqqa baqylaý jasaýyn kúsheıtedi. Úkimettiń memlekettik baǵdarlamalardy bekitkeni, bul quramǵa kirmeıtin ortalyq atqarýshy organdardy qurýy men taratýy jaýapkershilikti arttyra túspek. Prezıdent ókilettikteriniń aıtarlyqtaı bóligin berý eldi basqarýdyń neǵurlym tıimdi, ornyqty, qazirgi zamanǵy júıesin qurý úshin jasalǵan. Reformalar baǵdarlamasy aıqyn ári dáıekti demokratııalyq damýdy kózdeıdi. Muny bizdiń sút zaýytynyń ujymy da qoldaıdy», dep sózin túıindedi keıipkerimiz.
