Reforma úshin reforma jasaýdy doǵarý kerek — Prezıdent bilim salasyndaǵy ózgerister týraly
ASTANA. KAZINFORM — Bilim berý salasynda tek ataýy bar, naqty nátıjesi joq reformalardy júrgizýdi toqtatyp, ár ózgeristiń tıimdiligin aldyn ala jan-jaqty saralaý qajet. Memleket basshysy Qasym-Jomart Toqaev ustazdardy kezekti reformalarmen qajytyp, kúızeliske ushyratpaý kerektigin aıtyp, bilim salasyndaǵy ózgeristerge qatysty Úkimetke birqatar tapsyrma berdi.
Respýblıkalyq Tamyz keńesinde Prezıdent muǵalimderdiń biligin kóterý máselesine erekshe nazar aýdarý qajettigin aıtty.
— Alaıda osy saladaǵy kezekti aýqymdy reformany jasaımyz dep, búkil oqý júıesin qysqa merzimde túbegeıli ózgertýge bolmaıdy. Áıtpese, burynnan qalǵan teris nátıjeler osy asa mańyzdy salanyń tas-talqanyn shyǵarǵany esimizde bar. Mundaı synaqtar oqý salasyna úlken zııan ákeldi. Tek reforma úshin jaı ǵana aty bar, zaty joq reformalar júrgizýdi doǵarý qajet. Basqa sózben aıtqanda, reformalardy, ózgeristerdi, árıne, júrgizý kerek, biraq ondaı ózgerister muǵalimderdi ábden sharshatyp, olardy kúızeliske ushyratpaýy kerek, — dedi Memleket basshysy.
Prezıdenttiń aıtýynsha, árbir reformany, ásirese, bilim salasyndaǵy reformany júzege asyrý aldynda ony jan-jaqty saralaý qajet, onyń tıimdiligine ábden kóz jetkizý kerek.
— Reforma, bul — bastapqy synaq, eksperıment emes, bul — jaýapty sheshim men is-shara. Úkimet pedagogıkalyq joǵary oqý oryndarynyń qyzmetin qaıta qaraý kezinde bul máseleni mindetti túrde eskerýge tıis. Ustazdardy mektep pen balabaqshadaǵy jumystyń kásibı erekshelikterine barynsha beıimdeıtin biryńǵaı júıe qurý qajet degen usynys bar eken. Ony jan-jaqty qarap, qajet bolsa, iske asyrý kerek, — dedi Qasym-Jomart Toqaev.
Bul iske ádistemelik ortalyqtar, mektepke deıingi, orta jáne qosymsha bilim berý mekemeleri belsene atsalysýǵa tıis.
— Osy salaǵa jaýapty mınıstrlikter pedagogterdiń jańa býynyn daıarlaý úshin kúsh jumyldyrýy kerek. Bir jeńnen qol, bir jaǵadan bas shyǵaryp, jumyla áreket etý qajet, — deıdi Prezıdent.
Buǵan deıin Qasym-Jomart Toqaev elimizge taǵy bes myńnan astam muǵalim jetispeıtinin aıtqan edi.
Sondaı-aq Prezıdent elimizdegi mektep qurylysyn jandandyrýdy tapsyrdy.
