Referendýmnyń ádil, taza, ashyq ótetinine kúmánim joq – Erlan Qoshanov
ASTANA. KAZINFORM – QR Parlament Májilisiniń tóraǵasy Erlan Qoshanov Jańa Konstıtýtsııa boıynsha ótip jatqan jalpyhalyqtyq referendýmda daýys berdi.
Májilis tóraǵasy Astanadaǵy «Qazaqstan temir joly» ulttyq kompanııasynyń ǵımaratynda ornalasqan №128 saılaý ýchaskesinde daýys berdi.
– Referendýmnyń ádil, taza, ashyq ótetinine meniń kúmánim joq. Sebebi biz el-eldi aralap keldik. Halyqtyń kóńil-kúıin kórip otyrmyz, qoldaýyn sezip otyrmyz. Eshqandaı zańbuzýshylyqqa baratynyna negiz joq. Bul – tórt jyldyń ishindegi úshinshi referendým. Buǵan deıingi eki referendýmda da halyqtyń belsendiligin kórdińizder, – dedi E.Qoshanov tilshilerge bergen suhbatynda.
Májilis spıkeri 15 naýryz el tarıhyndaǵy erekshe oryn alatyn, tarıhı kún bolýy múmkin ekenin atap ótti.
– Buǵan deıingi ózgerister de halyqqa qajetti, halyqtyń suranysy men zaman talabynan týǵan qubylys boldy. Prezıdent Parlamenttik reforma bastamasyn dep jarty jyl buryn jarııalady, oǵan 10-15 myńǵa taıaý usynystar tústi. Onyń arasynda Parlamenttik reforma ǵana emes, Konstıtýtsııanyń basqa da baptaryna qatysty usynystar boldy. Konstıtýtsııalyq komıssııa osynyń barlyǵyn nazarǵa alyp, negizgilerin qabyldady, – dedi Erlan Qoshanov.
Aıta keteıik, jańa Konstıtýtsııa jobasynda Parlament jumysyna da qatysty ózgerister qamtylǵan. Onda eki palataly Parlamenttiń ornyna birpalataly Quryltaıdy qurý kózdelgen.
Depýtattar sany – 145 jáne olar proportsıonaldy júıe boıynsha (partııalyq tizimder arqyly) bes jylǵa saılanady.
Qazir elimizdegi jáne shet elderdegi barlyq ýchaskede daýys berý júrip jatyr.
