Referendýmnan keıingi basqarýdyń jańa formasy álemniń Qazaqstanǵa qyzyǵýshylyǵyn aıtarlyqtaı arttyrady – sarapshy

BAKÝ. QazAqparat – 5 maýsymda Konstıtýtsııaǵa engizilgen túzetýler boıynsha Qazaqstanda ótken referendým elimizdiń saıası jáne ekonomıkalyq júıesin qaıta iske qosýdy kózdeıdi, respýblıkanyń damýyn jańa deńgeıge shyǵarady dep esepteıdi sarapshy-ekonomıst, «Respýblıka» zertteý ortalyǵynyń basshysy Natıg Djafarlı, dep habarlaıdy QazAqparat menshikti tilshisi.

«Referendýmǵa deıin Prezıdent Qasym-Jomart Toqaev bıleýshi partııanyń basshysy qyzmetinen bas tartty. Bul – durys sheshim. Shyn máninde, partııa atqarýshy bılikke táýeldi bolmaǵan kezde halyqtyń oǵan degen senimi nyǵaıady, onyń bedeli artady. Bul qadam bolashaqta eldegi kóppartııaly júıeniń nyǵaıýyna oń áser etip, Qazaqstandaǵy saıası kúshter arasyndaǵy salaýatty básekelestiktiń artýyna yqpal etedi», - dep atap ótti ol.

Onyń aıtýynsha, Konstıtýtsııanyń jańa redaktsııasynyń eskiden basty aıyrmashylyǵy – bul basqarý júıesiniń ózgerýi, bıliktiń qatań vertıkalynan bas tartý, prezıdenttik basqarýdan prezıdenttik-parlamenttik respýblıkaǵa birqalypty jáne zańdy túrde kóshý.

Ekonomıstiń aıtýynsha, ótken referendýmnan keıin basqarýdyń jańa nysany álemniń Qazaqstanǵa, ásirese ınvestorlarǵa degen qyzyǵýshylyǵyn aıtarlyqtaı arttyrady.

«Túzetýler atqarýshy bılikke ǵana emes, sot bıligine de qatysty. Bul – ınvestorlar úshin óte mańyzdy sát. Sheteldik jáne jergilikti bıznes, ınvestıtsııalar zańnyń ústemdigin sezinýi kerek, bul bızneske senimdi bolýǵa kómektesedi», - dedi Natıg Djafarlı.