Referendýmǵa bastama jasaý dúıim eldiń táýelsizdikti nyǵaıtý, memleketti ornyqtyrý isine bergen zor baǵasy dep bilemin – N. Nazarbaev
ASTANA. 28 qańtar. QazAqparat /Qanat Mámetqazyuly/ - Referendýmǵa bastama jasaý dúıim eldiń táýelsizdikti nyǵaıtý, memleketti ornyqtyrý isine bergen zor baǵasy dep bilemin. Búgin QR Parlamenti palatalarynyń birlesken otyrysynda Qazaqstan halqyna arnaǵan Joldaýynda Memleket basshysy Nursultan Nazarbaev osylaı málimdedi.
«Taıaýda Elbasy ókilettigin uzartý úshin búkilhalyqtyq referendým ótkizý týraly halyqtyq bastama kóterilgeni belgili. Bastamaǵa úkimettik emes uıymdar men jekelegen azamattar, zııaly qaýym ókilderi men Parlament depýtattary qoldaý bildirýde. Dúıim eldiń bul ystyq yqylasyn táýelsizdikti nyǵaıtý, memleketti ornyqtyrý isine bergen zor baǵasy dep bilemin. Otandy qaltqysyz súıý - onyń sýyǵyna shydap, ystyǵyna kúıýdi talap etedi. Meniń bar ǵumyrym el taǵdyrymen enshiles. Maǵan synaqtyń kópirindeı qyltyldaǵan kezeńde Táýelsizdik alyp, memleketti qurý isi senip tapsyryldy. Sondyqtan men, senimge sert berip, bar jaýapkershilikti moınyma alǵan adammyn. Kúrmeýi qıyn, túrli taǵdyrly sheshimderdi júregimnen ótkizip, qabyldadym. Men 20 jyldan beri bar kúsh-jigerim men bilik tájirıbemdi aıamaı, halqyma qaltqysyz qyzmet etip kelemin», - dedi Memleket basshysy.
Budan soń Prezıdent osy jyldary eldiń mártebesin kóterip, mereıdi asyrǵan barsha jetistikterdi ortaq tabys retinde, barsha halyqtyń tabysy retinde baǵalap, bastamashylar men tilekshi bolǵan qazaqstandyqtarǵa rızashylyǵyn bildirdi.
