Referendýmǵa azamattardy májbúrlep qatystyrý saıasaty joq– Senat tóraǵasy

NUR-SULTAN. QazAqparat –Bul jolǵy referendýmnyń 1995 jyly ótken referendýmnan jóni bólek. Bul týraly daýys berý ýchaskesinde óz tańdaýyn jasaǵannan keıin BAQ-qa suhbat bergen QR Parlamenti Senatynyń tóraǵasy Máýlen Áshimbaev aıtty, dep habarlaıdy QazAqparat tilshisi.

«1995 jyly ótken referendýmǵa qatystym. Al bul jolǵy referendýmnyń jóni bólek. Atalǵan saıası shara ashyq ári demokratııaly túrde ótip jatyr. Halyqtyń óz oıyn aıtý múmkindigi bar. Synaý múmkindigi de bar. Referendýmǵa azamattardy májbúrlep qatystyrý degen saıasat joq. Qazaqstandyqtar tańdaýdy ózderi jasaıdy», - dedi Máýlen Áshimbaev.

Senat tóraǵasynyń aıtýynsha, halyq el ómirine qatysty saıası reformalarǵa belsene qatysýy tıis.

«Referendýmǵa otbasymmen keldim. Jubaıym jáne qyzym bar. Qyzym 18-ge tolyp alǵash ret daýys berip jatyr. Senat músheleri referendým ótedi degen sátten bastap jumysqa qyzý kiristi. Áriptesterim óńirlerdi aralap, halyq arasynda túsindirý jumystaryn júrgizdi», - deıdi ol.

Aıta keteıik, Máýlen Áshimbaev referendýmǵa saǵat 9:00-de kelip, №111 ýchaskede daýys berdi.