Referendýmdy uıymdastyrýǵa ketetin shyǵyn prezıdenttik saılaýdy ótkizýge ketetin shyǵynnan áldeqaıda tómen bolady - OSK tóraǵasy
ANA. 27 jeltoqsan. QazAqparat /Qanat Mámetqazyuly/ - Referendýmdy uıymdastyrýǵa ketetin shyǵyn prezıdenttik saılaýdy ótkizýge ketetin shyǵynnan áldeqaıda tómen bolady.
Búgin QR Ortalyq saılaý komıssııasynyń otyrysynda Qazaqstan Respýblıkasynyń Prezıdenti - Ult kóshbasshysy N.Á.Nazarbaevtyń prezıdenttik ókilettiligin 2020 jylǵy 6 jeltoqsanǵa deıin uzartý jónindegi referendýmnyń bastamashyl tobyn, sondaı-aq onyń respýblıkalyq referendýmǵa usynyp otyrǵan máselesin tirkeý týraly qaýly qabyldanǵannan keıin sóz sóılegen OSK tóraǵasy Qýandyq Turǵanqulov osylaı málim etti.
«Referendým ótkizýge baılanysty qarajat, onyń ishinde bastapqy uıymdastyrýshylyq qarajattary bastamashyl toptyń qarajaty esebinen atqarylady. Al qalǵan jumystar egerde Memleket basshysy referendým taǵaıyndaıtyn bolsa, onda Ortalyq saılaý komıssııasyna bıýdjetten qarajat bólinedi. Onan soń, OSK qarajattardy aýmaqtyq komıssııalarǵa bólip, referendýmnyń barlyq jumystaryn qarjylandyratyn bolady», - dedi Q. Turǵanqulov.
Onyń aıtýynsha, jalpylama alǵanda referendýmdy ótkizýge ketetin shyǵyn eldegi prezıdenttik saılaýdy ótkizýge ketetin shyǵynnan áldeqaıda tómen bolady.
Sonymen qatar, OSK tóraǵasynyń aıtýynsha, zańnamaǵa sáıkes, aýmaqtyq saılaý komıssııasy referendým sharasy bastalǵannan keıin «referendým komıssııasy» dep atalatyn bolady. Oǵan eshqandaı ózgerister men jańa komıssııalar jasaqtaý sharalary júrgizilmeıdi.
