Referendýmdy daıyndaý jáne ótkizý kezeńinde qandaı úgitterge tyıym salynady
ASTANA. KAZINFORM — Ortalyq referendým komıssııasynyń otyrysynda komıssııa múshesi Lázzat Súıindik referendýmdy daıyndaý jáne ótkizý kezeńinde qandaı úgitterge tyıym salynatynyn aıtty.
- Referendýmda kóteriletin másele boıynsha respýblıka azamattary, qoǵamdyq birlestik músheleri jınalystarda, mıtıngterde, BAQ-ta «Respýblıkalyq referendým týraly» konstıtýtsııalyq zańnyń 7-babynyń 1-tarmaǵyna sáıkes óz pikirlerin bildire alady.
Respýblıkalyq referendým qarsańynda úgit kelesi tásildermen júzege asyrylady. Birinshiden, BAQ arqyly, ekinshiden, jınalystar, mıtıngiler, azamattardyń jıyndary arqyly. Bul rette jınalystar, mıtıngiler «Qazaqstandaǵy beıbit jınalystardy uıymdastyrý jáne ótkizý tártibi týraly» zańǵa sáıkes ótkiziledi. Úshinshi tásil bul – BAQ, baspa úgit materıaldaryn taratý arqyly, ıaǵnı úsh tásil bar, - dedi komıssııa múshesi.
Onyń aıtýynsha, anonımdik úgit materıaldaryn taratýǵa tyıym salynady.
- Respýblıkalyq referendýmdy daıyndaý jáne ótkizý kezeńinde úgit materıaldaryn anonımdi túrde taratqandar úgit materıaldaryn daıyndaǵan nemese taratqany úshin, sonymen qatar aqparatty Qazaqstan aýmaǵynan tys jerde daıyndaǵany úshin jaýapqa tartylady. Atap aıtqanda, baspa materıaldary boıynsha olardyń basylǵan jeri men taralymy, tapsyrys bergen tulǵalar týraly aqparaty bolmaǵan jaǵdaıda. Bul boıynsha 25 AEK kóleminde aıyppul bar. Respýblıkanyń konstıtýtsııalyq qurylysyn kúshtep ózgertýge, tutastyǵyn buzýǵa, memlekettiǵ qaýipsizdigine nuqsan keltirýge, soǵysqa, áleýmettik, násildik, ulttyq, dinı, tektik, toptyń jáne rýlyq astamshylyqqa, sonymen qatar qatigezdik pen zombylyqqa úgitteýge jol bermeıdi, - dedi Lázzat Súleımenova.
Buǵan deıin referendýmdy ázirleý men ótkizý jónindegi negizgi is-sharalardyń jospary bekitilgenin jazǵan edik.
