Referendýmda tirkelgen kemshilikter tehnıkalyq sıpatta ǵana boldy — TMD baıqaýshylary
ASTANA. KAZINFORM — TMD baıqaýshylar mıssııasy referendým nátıjelerine áser etýi múmkin qandaı da bir zań buzýdy anyqtaǵan joq. Bul týraly TMD bas hatshysynyń birinshi orynbasary Igor Petrıshenko Ortalyq referendým komıssııasyndaǵy brıfıngte aıtty.
Referendým kúni mıssııa ókilderi eldiń 9 óńirindegi 750-den astam referendým ýchaskesine barǵan, sondaı-aq sheteldegi ýchaskelerde de baqylaý júrgizgen.
Mıssııa músheleriniń málimetinshe, ýchaskeler ýaqytynda ashylyp, daýys berý memlekettik ánuranmen bastalǵan. Daýys berý uıymdasqan túrde jáne tynysh jaǵdaıda ótken.
— Daýystardy sanaý rásimi Qazaqstan Respýblıkasynyń zańnamasyna sáıkes júrgizildi. Baıqaýshylar tirkegen keıbir kemshilikter tehnıkalyq sıpatta boldy jáne ýchaskelik komıssııalar tarapynan jedel túrde joıyldy. Referendým nátıjelerine áser etýi múmkin zań buzý anyqtalǵan joq. TMD mıssııasy «15 naýryzdaǵy referendým Qazaqstan Respýblıkasynyń zańnamasyna tolyq sáıkes jáne joǵary uıymdastyrýshylyq deńgeıde ótti» degen qorytyndyǵa keldi. Memlekettik bılik organdary men referendým komıssııalary azamattardyń erkin túrde óz tańdaýyn bildirýine múmkindik jasady, — dedi Igor Petrıshenko.
Aıta keteıik, Ortalyq referendým komıssııasy respýblıkalyq referendýmdaǵy daýys berýdiń aldyn ala nátıjelerin jarııalady.
Referendýmǵa qoıylǵan máseleniń oń sheshimin jaqtap daýys bergen azamattardyń sany 7 mıllıon 954 myń 667 adam nemese 87,15%.