Referendýmda respýblıkalyq qoǵamdyq shtabtar nátıjeli jumys istedi – Tóleýbek Muqashev
«Keshegi referendým tarıhı oqıǵa. Óıtkeni bul 27 jyldan keıin ótken ekinshi referendým. Prezıdenttiń referendým ótkizý týraly tapsyrmasyna sáıkes Qazaqstan máslıhattary depýtattarynyń birlestiginiń bastamasymen el aýmaǵynda qoǵamdyq shtabtar quryldy. Respýblıkalyq qoǵamdyq shtabqa múshe retinde quzyrly organdar jáne úkimettik emes uıym ókilderi, máslıhat depýtattary, zııaly qaýym, jastar, saıası partııalar jáne BAQ ókilderi tirkeldi. Shtab músheleri elimizdiń barlyq óńirinde referendým ótedi degen sátten bastap jumys istedi. Úgit-nasıhat, túsindirý naýqany kezinde bizdiń ókilderi aýyl, aýdandardy aralap halyqpen kezdesti. Referendým kúni de respýb l ıkalyq qoǵamdyq shtabtar nátıjeli jumysty kórsetti. Memleket basshysy jańa Qazaqstandy qurý ıdeıasyn kóterip, ıgilikti isti el bolyp jumyla iske asyrýǵa shaqyrdy», - dedi respýblıkalyq qoǵamdyq shtabtyń jetekshisi Tóleýbek Muqashev BAQ ókilderine arnalǵan baspasóz máslıhatynda.
Onyń aıtýynsha, Konstıtýtsııaǵa engizilgeli otyrǵan ózgerister elimizdiń damýynda mańyzdy sanalatyn salalardy qamtıdy.
«Qazir biz jańa Qazaqstanǵa qadam jasap jatyrmyz. El jetistigi eselene tússin desek, ár qazaqstandyq óz úlesin qosýy kerek. Biz elimizdiń ár azamaty jańa Qazaqstan ıdeıasyn sezine alsa deımiz. Onyń negizi eldiń damý kórsetkishi ǵana emes, beıbit ómir jáne qoǵamnyń tynyshtyǵymen de baılanysty», - deıdi ol.
