Referendýmda óz tańdaýymdy jasadym – alǵashqy daýys berýshi
ORAL. KAZINFORM – Batys Qazaqstan oblysynda 489 ýchaskege kelýshiler referendým kúni daýys berip jatyr.
BQO aýmaqtyq referendým komıssııasynan málim etkenindeı, sonyń 136-sy Oral qalasynda ornalasqan. 353 ýchaske aýdandarda azamattardy qabyldap jatyr.
BQO boıynsha barlyǵy 446 391 azamattyń daýys berý quqyǵy bar. Onyń basym bóligi nemese 237 532 adam oblys ortalyǵynda tirkelgen. Óńirde 4 089 jas alǵash ret daýys beredi.
Daýys berý úrdisin akkredıttelgen qoǵamdyq birlestikter men kommertsııalyq emes uıymdar men buqaralyq aqparat quraldary ókilderi baqylaıdy.
Oral qalasynda J.Dosmuhamedov atyndaǵy joǵary pedagogıkalyq kolledjinde ornalasqan № 268 ýchaskede daýys berý qalypty júrip jatyr.
- Men búgin referendýmda tolqynysty sátti sezinip jatyrmyn. Jýyrda ǵana 18 jasqa tolǵan edim. Bul – men úshin qýanyshty sát. Óz tańdaýymdy jasadym. Bolashaq jastardyń qolynda, - dedi osy pedagogıkalyq kolledjdiń stýdenti Aqbóken Ermekqalı.
Zachagan kentindegi H.Dospanova atyndaǵy № 30 mekteptegi ýchaskelik komıssııa hatshysy Gúlmarjan Qydyrǵalıevanyń aıtýynsha, munda barlyǵy daýys berý quqyǵy bar 2 465 azamat tirkelgen. Sonyń 35-i úıden daýys beredi.
Bul ýchaskede 84 jastaǵy aqsaqal Abdosh Qýanshalıev alǵashqy bolyp daýys berdi. Birinshi bolyp daýys bergenderge estelik syılyqtar tabys etildi.
- Bári jaqsy uıymdastyrylǵan. Merekedegideı kóńil kúı seziledi. Komıssııa músheleri iltıpatpen qarsy alyp, qurmet kórsetip jatyr. Rızamyn. Osy jasyma deıin barlyq saıası naýqannan tys qalmaı, óz kózqarasymdy bildirip kele jatyrmyn. Bul – ár azamattyń boryshy dep oılaımyn, - dedi A.Qýanshalıev.
Eske sala keteıik, budan buryn Batys Qazaqstanda referendým kúni 489 ýchaske jumys isteıtinin jazǵan bolatynbyz.