Referendýmda múgedektigi bar adamdardyń daýys berýine tolyq jaǵdaı jasalady — Nurlan Ábdirov
ASTANA. KAZINFORM — Konstıtýtsııa jobasyna oraı 15 naýryzda ótetin referendým barysynda múgedektigi bar adamdardyń daýys berýine tolyq jaǵdaı jasalady. Bul týraly Ortalyq referendým komıssııasynyń tóraǵasy Nurlan Ábdirov aıtty.
— Barlyq saılaýda múgedektigi bar adamdarǵa erekshe múmkindik jasaýdy nazarymyzdan shyǵarmaımyz. Jergilikti atqarýshy organdardyń ókilderine mynany aıtqym keledi. Ortalyq referendým komıssııasy bekitken qaýlydaǵy tapsyrmalardy jáne bizdiń komıssııanyń janyndaǵy múgedektigi bar adamdardyń saılaý quqyqtaryn qamtamasyz etý jónindegi jumys toby ázirlegen usynystardyń oryndalýyn baqylaýymyzda ustaımyz jáne bul — Ortalyq referendým komıssııasy músheleriniń óńirlerge ınspektsııalyq saparlary kezindegi negizgi anyqtaıtyn máselelerdiń biri, — dedi komıssııa tóraǵasy.
Onyń aıtýynsha, barlyq daýys berý ýchaskesinde Konstıtýtsııa jobasynyń mátinin aýdıo súıemeldeýmen ornalastyrý múgedektigi bar adamdar úshin qoljetimdilikti qamtamasyz etýge baǵyttalǵan jańa tásil sanalady.
— Bul bastamany Ortalyq referendým komıssııasynyń usynysy retinde jumys tobynyń músheleri qoldady. Atalǵan tásil azamattardy aqparattandyrýdyń tıimdi quraly bola otyryp, olardyń konstıtýtsııalyq quqyqtaryn iske asyrýǵa jáne daýys berýge qoljetimdiligin qamtamasyz etýdiń qosymsha tetigi bolatyny atap ótildi, — dedi ol.
Komıssııa tóraǵasynyń atap ótýinshe, kózi kórmeıtin jáne nashar kóretin azamattarǵa arnalǵan Braıl árpimen ázirlengen trafaret úlgisi jumys toby otyrysynda qaralyp, talqylaý nátıjesinde usynystar eskerildi. Túzetýler engizilip, saraptamanyń oń qorytyndysy alyndy.
— Qazirgi tańda trafaretterdi daıyndaý jáne basyp shyǵarý jumystary júrgizilip jatyr. Olar barlyq referendým ýchaskesine jetkiziledi. Sondaı-aq ár ýchaskede bıýlletenderdi toltyrý týraly arnaıy aýdıo nusqaýlyq qarastyrylǵan. Osylaısha, kórý qabileti buzylǵan azamattardyń derbes ári kedergisiz daýys berýine qajetti jaǵdaı tolyq qamtamasyz etilip otyr. Osy jumystyń ýaqytyly ári sapaly oryndalýyn qamtamasyz etý maqsatynda barlyq áriptesti atalǵan máseleni jeke baqylaýǵa alýdy tapsyramyn, — dedi Nurlan Ábdirov.
Aıta keteıik, «Qoǵamdyq pikir» zertteý ınstıtýty júrgizgen saýalnama nátıjesine sáıkes, jańa Konstıtýtsııa jobasy boıynsha jalpyhalyqtyq referendým qarsańynda qoǵamda oń kóńil-kúı qalyptasqan.