Referendýmda qabyldanǵan jaǵdaıda jańa Konstıtýtsııa qashan kúshine enedi

ASTANA. KAZINFORM — Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda Ata zańnyń naqty qashan kúshine enetini anyq jazyldy.

Búgin jarııalanǵan jańa Konstıtýtsııa jobasynyń «Qorytyndy jáne ótpeli erejeler» dep atalatyn sońǵy bóliminiń 94-baby 1-tarmaǵyna sáıkes, respýblıkalyq referendýmda qabyldanǵan Qazaqstan Respýblıkasynyń Konstıtýtsııasy 2026 jylǵy 1 shildeden bastap kúshine enedi, buǵan deıin qabyldanǵan Qazaqstan Respýblıkasy Konstıtýtsııasynyń qoldanysy sol mezgilden bastap toqtatylady.

Al 2-tarmaqta respýblıkalyq referendýmda Konstıtýtsııa qabyldanǵan kún memlekettik mereke — Qazaqstan Respýblıkasynyń Konstıtýtsııasy kúni dep jarııalanatyny naqty kórsetilgen.

Esterińizge sala ketsek, keshe Memleket basshysy Qasym-Jomart Toqaev 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy. Demek, ótkiziletin referendým barysynda jańa Konstıtýtsııa qabyldanǵan jaǵdaıda 15 naýryz — Konstıtýtsııa kúni bolyp bekitiledi. Al el azamattary memlekettik merekeni kelesi jyldan bastap atap ótedi.