Referendýmda halyqtyń daýsy mańyzdy – Aıda Balaeva
ASTANA. KAZINFORM – Mádenıet jáne aqparat mınıstri Aıda Balaeva Astanada Ulttyq akademııalyq kitaphanada ornalasqan №164 daýys berý ýchaskesinde óz tańdaýyn jasady.
«AES-ti salýǵa qatysty referendým saıası másele emes, biraq ekonomıkalyq turǵydan alyp qaraǵanda elimizdiń erteńgi damýyna birden bir yqpal etetin is-shara. Osy máselede halyqtyń daýsy mańyzdy, óıtkeni qoǵamda ártúrli pikirler bolǵandyqtan, referendým ótkizý týraly sheshim qabyldandy. Sondyqtan el bolashaǵyna jaýapty azamattardyń barlyǵy daýys berý ýchaskelerine kelip jatyr, men de azamattyq boryshymdy ótep, óz tańdaýymdy jasadym», - dedi Aıda Balaeva referendýmda daýys bergen soń BAQ ókilderiniń saýalyna jaýap bere turyp.
Mınıstrdiń pikirinshe, ár azamat referendýmda daýys berip, óz tańdaýyn jasaýy qajet.
Buǵan deıin atalǵan ýchaskede Senat tóraǵasy Máýlen Áshimbaev daýys berdi. Onyń aıtýynsha, referendým – Qazaqstannyń demokratııalyq damýyndaǵy mańyzdy qadam.
Odan bólek, Memlekettik keńesshi Erlan Qarın Qazaqstan – TMD jáne Ortalyq Azııadaǵy referendým ótkizip jatqan birden-bir el ekenin aıtty.
