Referendýmda eki zań buzý faktisi tirkeldi – Bas prokýratýra
ASTANA. KAZINFORM – Referendým ótip jatqanda saýalnama júrgizip jáne úgit-nasıhat júrgizgen eki azamat anyqtaldy. Bul týraly Bas prokýratýra qoǵamdyq múddelerdi qorǵaý qyzmetiniń basqarma bastyǵy Bekjan Qaramanov málim etti.
«Referendýmda daýys berý qalypty jaǵdaıda ótýde. Búginde eki zań buzý faktisi anyqtaldy. Birinshisi, jeke tulǵa men qoǵamdyq pikirge zańsyz saýalnama júrgizýge qatysty. Ol Ákimshilik-quqyqbuzýshylyq týraly kodekstiń 120-baby 3 -bóligi boıynsha jaýapqa tartyldy, ıaǵnı aıyppul salyndy. Ekinshisi, zańsyz úgit júrgizý faktisi anyqtaldy. Ol boıynsha azamatqa joǵaryda atalǵan kodekstiń 102 baby boıynsha aıyppul salyndy», - dedi Bekjan Qaramanov Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, eki jaǵdaıda da quqyq buzýshylar óz kinásin moıyndady.
«Osy jaıttardy eskere otyryp, referendýmǵa qatysýshylardyń nazaryn, daýys berý kúni, naqty aıtqanda búgin saýalnama júrgizip, úgit-nasıhat júrgizýge tyıym salynatynyn eske salamyz. Qazirgi ýaqytta prokýratýralar men sotqa referendýmǵa qatysty aryz-shaǵym túsken joq. Prokýratýra organdary men respýblıkalyq referendým ótkizýdiń zańdylyǵyn qamtamasyz etý jalǵasyp jatyr», - deıdi ol.
