Referendýmda 492 myńnan astam qyzylordalyq daýys bere alady

QYZYLORDA. KAZINFORM — Qyzylorda oblysyna ortalyq referendým komıssııasy tóraǵasynyń orynbasary Muhtar Erman jumys saparymen keldi. Bul týraly oblystyq referendým komıssııasy habarlady. 

Ol aldymen S. Ysqaqov atyndaǵy oqý ǵımaratynda ornalasqan № 207, T.Esetov atyndaǵy mektep ǵımaratynda ornalasqan № 264 ýchaskelerdiń jumysymen tanysyp, jabdyqtalýyn baqylady. Komıssııa múshelerine referendým protsesi ashyq ári árbir azamatqa qoljetimdi bolýy keregin, múgedektigi bar daýys berýshilerdiń quqyǵyn saqtaý mańyzdy ekenin eskertti.

№ 207 ýchaskede - 2617, al № 264 ýchaskede 2052 daýys berýshi tirkelgen. Jalpy, Syr óńirinde 492 524 azamat tizimge engen. 9 aýmaqtyq, 378 ýchaskelik komıssııa bar bolsa, onyń 2705 múshesi bar.

Muhtar Erman quqyq qorǵaý organdarynyń, oblystyq mekemelerdiń basshylarymen, Qyzylorda qalasy men aýdandardaǵy aýmaqtyq referendým komıssııalarynyń tóraǵalarymen kezdesti.

Jıynda daýys berýshilerge referendým ótetin kún men ýaqyty belgilengen shaqyrý qaǵazdaryn árbir azamatqa jetkizý, ýchaskelerdi jabdyqtaý jáne múgedektigi bar azamattarǵa qolaıly jaǵdaı jasaý baǵyttary qozǵaldy.

Komıssııa músheleriniń biliktiligin arttyrý úshin kópsheli semınar-trenıng uıymdastyryldy. Alǵashqy kezeńde 1190 adam oqysa, qalǵan komıssııa músheleri kaskad ádisimen bilimderin jetildiredi.

Buǵan deıin Qazaqstannyń Belgııadaǵy elshiliginde Eýroodaqtyń negizgi ınstıtýttarynyń ókilderi, resmı jáne sarapshy ókilderdiń qatysýymen Qazaqstannyń jańa Konstıtýtsııasynyń jobasy men aldaǵy referendýmdy talqylaý ótken bolatyn.