Referendýmda 320 myńnan astam bıýlleten jaramsyz dep tanyldy
NUR-SULTAN. QazAqparat – Referendýmda 320 myńnan astam bıýlleten jaramsyz dep tanyldy. Bul týraly Ortalyq referendým komıssııasynyń tóraǵasy Nurlan Ábdirov aıtty, dep habarlaıdy QazAqparat tilshisi.
«Jaýaptardyń eki nusqasy da tańdalǵan, ıaǵnı, jaramdy dep tanylǵan, alaıda daýystary sanaý kezinde eskerilmeıtin bıýlletender sany 1,58 paıyzdy nemese 125 859 bıýlletendi qurady. Qalǵan bıýlletender daýys berýshilerdiń erik bildirýin anyqtaý múmkin emes dep tanylǵandyqtan olar jaramsyz dep tanyldy. Mundaı bıýlletender sany 2,58 paıyz 206 096 bıýlleten boldy», - dedi Nurlan Ábdirov.
Onyń atap ótýinshe, aımaqtyq komıssııalar daýystardy sanaǵannan keıin 2 kún ishinde hattamalardyń túpnusqalaryn árbir óńir boıynsha jetkizýge tıis. Respýblıkalyq referendýmnyń qorytyndylary Ortalyq referendým komıssııasynyń otyrysynda belgilenedi. Ony ótkizý kúni men ýaqyty qosymsha habarlanady.
Buǵan deıin habarlaǵanymyzdaı, referendýmǵa qatysýǵa qoıylǵan máseleniń oń sheshimin jaqtap daýys bergen azamattardyń sany elimizdiń barlyq óńirlerinde daýys berýge qatysqandardyń 77,18 paıyzyn quraıdy. Al bul 6 163 863 adam. Bul 17 óńirdiń árqaısysynda absolıýtti kópshilikti qurap otyr. Osylaısha oblystardyń, respýblıkalyq mańyzy bar qalalardyń, astananyń keminde úshten ekisinde qoldaý qajettigi týraly Konstıtýtsııalyq zań talaby saqtaldy.
