Referendýmda 12 mln 400 myńnan astam daýys berý quqyǵyna ıe - Aımanaqulov
ASTANA. KAZINFORM — Konstıtýtsııa jobasyna qatysty referendým kúni 10 413 daýys berý ýchaskesi jumys isteıdi. Bul týraly Ortalyq referendým komıssııasynyń otyrysynda komıssııa múshesi Azamat Aımanaqulov aıtty.
- Referendým ýchaskeleriniń barlyq sany – 10 413. Onyń ishinde azamattardyń turǵylyqty jeri boıynsha qurylǵandary - 9 779, ýaqytsha bolý oryndarynda qurylǵandary – 634. Olardyń ishinde 64 shet memlekette ornalasqan ýchaskelerdiń sany - 82. Referendým komıssııalary músheleriniń sany 71 044 adam. Osy jylǵy 1 qańtardaǵy jaǵdaı boıynsha daýys berýge qatysýǵa quqyǵy bar azamattardyń tizilimine turǵylyqty jeri boıynsha turaqty tirkelgen 12 416 759 azamat engizildi, ıaǵnı respýblıkalyq referendýmǵa qatysýǵa quqyǵy bar azamattardyń tizimin jasaý úshin negiz bar, - dedi ol.
Onyń aıtýynsha, oǵan tek qańtar, aqpan aılaryndaǵy azamattardyń kóshi-qon dınamıkasyna baılanysty jáne azamattar bergen ótinishterdi esepke alý boıynsha túzetýler engizý qajet.
- «Qazaqstan Respýblıkasyndaǵy saılaý týraly» konstıtýtsııalyq zańnyń 24-babynyń 5- tarmaǵyna sáıkes respýblıkalyq referendýmǵa qatysý quqyǵy bar azamattar tiziminiń durystyǵy úshin jergilikti atqarýshy organdarynyń laýazymdy adamdary jaýap beretinin erekshe atap ótken jón. Respýblıkalyq referendýmǵa qatysýǵa quqyǵy bar azamattardyń tizimin qalyptastyrý jónindegi jumystar «Respýblıkalyq referendým týraly» konstıtýtsııalyq zańǵa jáne «Saılaý týraly» konstıtýtsııalyq zańǵa, sondaı-aq Ortalyq saılaý komıssııasynyń 2018 dylǵy 23 tamyzdaǵy «Daýys berý úshin saılaýshylar tizimin qalyptastyrý, olardy saılaý komıssııalaryna usyný qaǵıdalaryn bpekitý týraly» qaýlysymen retteledi, - dedi Azamat Aımanaqulov.
Buǵan deıin referendýmdy ázirleý men ótkizý jónindegi negizgi is-sharalardyń jospary bekitilgenin jazǵan edik.
