Referendým jáne merekelik kóńil-kúı: Qaraǵandy oblysynda daýys berý kúni qalaı ótip jatyr
QARAǴANDY. KAZINFORM — Qaraǵandy oblysynda jańa Konstıtýtsııa jobasy boıynsha respýblıkalyq referendým kúni belsendi ári merekelik atmosferada ótip jatyr. Turǵyndar daýys berý ýchaskelerine otbasylarymen kelip, jármeńkeler men kontsertterge qatysyp jatyr, al tanymal qoǵam qaıratkerleri men bılik ókilderi óz tańdaýlaryn jasap úlgerdi.
Búgin Qaraǵandy oblysynda jańa Konstıtýtsııa jobasyn qabyldaý máselesi boıynsha respýblıkalyq referendým aıasynda daýys berý ótip jatyr. Daýys berý ýchaskeleri tańǵy saǵat 7:00–de ashylyp, alǵashqy saǵattardan bastap óńir turǵyndary azamattyq ustanymdaryn bildirý úshin belsendi túrde kelip jatyr.
Naqtylanǵan málimetterge sáıkes, daýys berýge qatysý quqyǵyna oblystyń 757 671 turǵyny ıe. Referendýmdy uıymdastyrý úshin 651 komıssııa qurylǵan: onyń ishinde 14 aýmaqtyq jáne 637 ýchaskelik komıssııa bar. Olardyń quramynda 4415 komıssııa múshesi jumys isteıdi.
Óńir aýmaǵynda 637 daýys berý ýchaskesi ashylǵan. Olardyń barlyǵy qajetti jabdyqtarmen — jasyryn daýys berýge arnalǵan kabınalar, bıýlleten jáshikteri jáne aqparattyq materıaldarmen qamtamasyz etilgen.
Múmkindigi shekteýli azamattarǵa jaǵdaı jasaýǵa erekshe kóńil bólingen. Atap aıtqanda, 562 ýchaske pandýstarmen, 589 ýchaske taktıldi kórsetkishtermen jabdyqtalǵan. Daýys berý kúni 140 ınvataksı kóligi, 74 onlaın sýrdoaýdarmashy, sondaı-aq 1700-ge jýyq jeke kómekshi qyzmet kórsetip jatyr.
Protsestiń ashyqtyǵyn qamtamasyz etý úshin ýchaskelerde qoǵamdyq birlestikter men úkimettik emes uıymdardyń baqylaýshylary, buqaralyq aqparat quraldarynyń ókilderi jáne halyqaralyq baqylaýshylar jumys istep jatyr. Árbir ýchaskede jańa Konstıtýtsııa jobasynyń mátinderi memlekettik jáne orys tilderinde ornalastyrylǵan, sondaı-aq onyń aýdıo-nusqasy da daıyndalǵan.
Daýys berý kúni azamattarǵa qolaıly jaǵdaı jasaý úshin qosymsha servıster iske qosylǵan. 346 iri ýchaskede azamattardyń tirkelýin onlaın tekserý múmkindigi bar. Qaraǵandy qalasynda ýaqytsha tirkeýden ótýge bolatyn alty ýchaske anyqtalǵan. Sonymen qatar óńirde turǵyndarǵa qajetti aqparat beretin 15 call-ortalyq jumys isteıdi.
Keıbir ýchaskelerde daýys berý ýaqyty standartty kesteden ózgeshe. Atap aıtqanda, áskerı bólimderde jáne vahtalyq ádispen jumys isteıtin kásiporyndarda ornalasqan 11 ýchaskede daýys berý tańǵy 06:00–de bastaldy. Sondaı-aq azamattardyń ýaqytsha bolatyn 33 ýchaskesinde tizimdegi barlyq saılaýshy daýys berip úlgerse, daýys berý merziminen buryn aıaqtalýy múmkin. Osyndaı tártip qoljetimdiligi qıyn aýmaqta ornalasqan Shet aýdany Aqjartas bólimshesinde de qoldanylady.
Óńirde referendým kúni tek saıası oqıǵa retinde ǵana emes, qoǵamdyq shara retinde de ótýde. Búgin oblystyń qala jáne aýdandaryndaǵy 286 saılaý ýchaskesiniń janynda «Naýryz seıl» jármeńkesi uıymdastyryldy.
Turǵyndar men qonaqtar jergilikti óndirýshilerdiń ónimderine belsendi qyzyǵýshylyq tanytýda. Bastama otandyq óndirýshilerdi qoldaýǵa, ishki saýdany damytýǵa jáne óńir turǵyndary men qonaqtaryna merekelik kóńil-kúı syılaýǵa baǵyttalǵan. Aktsııa aıasynda azyq-túlik jáne azyq-túlik emes taýarlarǵa arnaıy jeńildikter usynylyp, aktsııalyq ónimder «Nauryz» merekelik navıgatsııasymen belgilengen.
Aktsııaǵa kásipkerler men iri saýda jelileri — «Korzına», Magnum, «Aıan», «ıÝjnyı», «Real», «Norma», «Optıma», sondaı-aq «Abzal», «12 mesıatsev», Global City, «Ýmaı», «Taır», City Mall, Grand Store, «BÝM», «Kaskad», «Prospekt», «Stroımart» saýda úıleri men saýda-oıyn-saýyq ortalyqtary qatysyp jatyr.
Temirtaýda merekelik atmosfera kontserttik baǵdarlamalarmen tolyqty. Atap aıtqanda, № 294 jáne № 295 ýchaskelik komıssııalarynda turǵyndar úshin shyǵarmashylyq ujymdar óner kórsetti. Kontserttik baǵdarlamalar daýys berýge kelgender úshin jaǵymdy syı boldy.
Óńir turǵyndary referendýmǵa otbasylarymen kelip, azamattyq jaýapkershilikterin birge kórsetip, mańyzdy qoǵamdyq máselelerdi talqylaýda.
Máselen, Qarqaraly qalasynyń turǵyny Mardan Áljan № 466 ýchaskege jubaıy Bıbinur Saıatqyzy jáne tórt balasymen birge keldi. Otbasy alǵashqylardyń biri bolyp daýys berip, estelik syılyq aldy.
— Biz referendýmǵa búkil otbasymyzben keldik. Jubaıymmen birge óz tańdaýymyzdy jasadyq. Ár adam daýys berý arqyly eldiń damýyna úles qosady. Bul — memlekettiń árbir turǵynynyń azamattyq boryshy, — dedi Mardan Áljan.
Alǵashqylardyń qatarynda daýys bergenderdiń biri — Buqar jyraý aýdanynyń Novoýzenka aýylynan kelgen 90 jastaǵy aqsaqal Mereke Syzdyqov boldy. Buryn ol birneshe jyl boıy jergilikti sovhozdy basqarǵan. Qurmetti jasyna qaramastan, ol azamattyq ustanymyn alǵashqylardyń biri bolyp bildirýdi jón sanaǵan.
Qaraǵandy qalasyndaǵy № 10 orta mektepte ornalasqan № 65 ýchaskede Dúnıejúzi qazaqtary qaýymdastyǵynyń oblystyq fılıalynyń jetekshisi, Qazaqstannyń mádenıet qaıratkeri, oblystyq máslıhat depýtaty ári ánshi Merýesh Bashaı daýys berdi.
Onyń aıtýynsha, referendýmǵa qatysý — árbir azamattyń sanaly tańdaýy.
— Bul jaı ǵana bıýlletendegi belgi emes, bul — el taǵdyryna beıjaı qaramaıtyn adamnyń tańdaýy. Referendým — halyq óz bolashaǵyn ózi aıqyndaıtyn erekshe sát. Búgin qabyldanǵan árbir sheshim balalarymyz ben nemerelerimizdiń ómirine áser etedi, — dedi ol.
Temirtaýda daýys berýge Qaraǵandy ındýstrııalyq ýnıversıtetiniń rektory Baqyt Jáýtikov qatysty. Ol qalanyń bir saılaý ýchaskesinde daýys berip, azamattardyń mańyzdy memlekettik sheshimderdi qabyldaýǵa qatysýynyń mańyzyn atap ótti.
Temirtaý qalasynyń ákimi Ǵalym Áshimov te referendýmda daýys berdi. Bul týraly ol óziniń Instagram áleýmettik jelisindegi jeke paraqshasynda jazdy.
— Búgin respýblıkalyq referendýmǵa qatysyp, óz daýysymdy berdim. Qaraǵandy ındýstrııalyq ýnıversıtetiniń ǵımaratynda ornalasqan № 265 ýchaskede daýys berdim. Árbir daýys mańyzdy, — dep jazdy metallýrgter qalasynyń ákimi.
Referendým kúni Qaraǵandy oblysynyń ákimi Ermaǵanbet Bólekpaev ta azamattyq ustanymyn bildirdi. Ol № 17 ýchaskede daýys berdi.
— Búgin Qazaqstan azamaty retinde elimizdiń, balalarymyz ben nemerelerimizdiń bolashaǵy úshin óz tańdaýymdy jasaýǵa keldim. Jańa Konstıtýtsııa — jańa múmkindikter men bastamalardyń negizi, — dedi óńir basshysy.
Bul ýchaskede 2222 saılaýshy tirkelgen. Olardyń ishinde 18 jasqa tolyp, alǵash ret daýys berip otyrǵan 59 jas bar.
Oblys ákiminiń aıtýynsha, referendým tek memlekettik mańyzǵa ıe shara ǵana emes, árbir qazaqstandyq otbasy úshin de mańyzdy. Ol sondaı-aq óńirdegi saılaý ýchaskeleriniń tehnıkalyq jáne uıymdastyrýshylyq daıyndyǵynyń joǵary deńgeıde ekenin atap ótti.
Kún boıy azamattardyń daýys berý belsendiligin Qazaqstan Respýblıkasy Referendým jónindegi ortalyq komıssııasynyń resmı resýrstarynan baqylaýǵa bolady.
Aıta ketý kerek, óńirler arasynda eń joǵary qatysý kórsetkishi Qaraǵandy oblysynda tirkeldi — 26,64%. Bul qazirgi ýaqytta respýblıka boıynsha eń joǵary kórsetkish bolyp otyr.
