Referendým jańa saıası mádenıetti damytý turǵysynan mańyzdy qadam boldy - sarapshy
Onyń aıtýynsha, qoǵamnyń talaptary prezıdenttik saıası reformalarlyń tórt paketinde eskerilip, iske asyryldy. Osy turǵyda mańyzdy bastamalardy júzege asyrýǵa múmkin boldy. Bul óz kezeginde qoǵamda ózara jaýapkershilik pen senimniń jańa saıası mádenıetin qurýdyń bastaýy boldy. Saıası ózgerister barlyq deńgeıde azamattardyń sheshim qabyldaýǵa ázir ekenin kórsetti. Osy oraıda sýperprezıdenttik basqarý túrinen túbegeıli bas tartyp, Parlament pen máslıhattardyń ókilettigin kúsheıtýge ekpin qoıylyp otyr.
Memleket basshysy atalǵan strategııalyq qadamdy naqty iske asyrý úshin Prezıdent ókilettigine qatysty bastamalardy usyndy. Sonymen qatar, bıliktiń ókildi tarmaqtaryn qaıta qurý, saılaý júıesin jetildirý, partııa júıesin damytý úshin múmkindikterdi keńeıtý, daýys berý protsesin jańǵyrtý, quqyq qorǵaý ınstıtýttaryn kúsheıtý, BAQ-tyń básekege qabilettigin arttyrý men azamattyq qoǵam ınstıtýttarynyń rólin nyǵaıtý, birinshi kezektegi daǵdarysqa qarsy is-sharalardy qamtý eskerildi.
Bul bastamalardy iske asyrý baǵytynda Konstıtýtsııanyń 30-dan astam babyna túzetýler engizý kerek boldy. Bul rette osy ózgeristerdiń aýqymdylyǵyn aıtýǵa bolady.
«Qazirgi kezde usynylǵan túzetýler qoǵamda keńinen talqylanǵan bolatyn. Osy turǵyda Prezıdenttiń el Konstıtýtsııasyna engiziletin ózgerister jobasyna referendým ótkizý týraly sheshimi erekshe mańyzdy dep oılaımyn. Bul óz kezeginde jańa saıası mádenıetti damytý turǵysynan sheshýshi qadam. Osy oraıda búkil saıası júıeni qaıta jańǵyrtý, onyń quqyqtyq negizin qurý degendi bildiredi», - dedi Z. Shaýkenova.
Budan buryn habarlanǵandaı, Qazaqstanda 10 013 referendým ýchaskesi iske qosylady.
Ortalyq referendým komıssııasy bıýlletenderdi daıyndaýǵa qatysty qaýly qabyldady.
