Referendým: TMD-dan 100-ge jýyq baıqaýshy keledi

ASTANA. KAZINFORM – 15 naýryzda ótetin referendýmdy TMD-dan 100-ge jýyq baıqaýshy qadaǵalaıdy. Bul týraly TMD Baıqaýshylar mıssııasy shtabynyń jetekshisi Evgenıı Kozıak aıtty.

- Qazir ǵana Ortalyq referendým komıssııasynyń tóraǵasy Nurlan Ábdirovpen kezdesýimizdi aıaqtap, halyqaralyq baıqaýshylar retinde akkredıtatsııamyzdy aldyq. Endi búginnen bastap mıssııamyz Qazaqstan Respýblıkasy Konstıtýtsııasynyń jobasy boıynsha respýblıkalyq referendýmnyń ótýin monıtorıngileýge resmı túrde kiriskenin málimdeı alamyn. Biz munda alǵash ret kelip otyrǵan joqpyz. Bul — Qazaqstan Respýblıkasyna 19 saparymyz. Jalpy alǵanda, bul 2001 jyldan, ıaǵnı Táýelsiz Memleketter Dostastyǵy Memleket basshylary keńesiniń sheshimimen TMD keńistiginde saılaý naýqandaryn monıtorıngileýdi alǵash bastaǵan ýaqyttan bergi 133 mıssııamyz bolmaq. Mıssııamyzdyń quramynda shamamen júzge jýyq halyqaralyq baıqaýshy akkredıtatsııadan ótedi dep boljap otyrmyz, - dedi ol.

Onyń aıtýynsha, mıssııa quramyn jasaqtaý jumysy bastaldy. Mıssııa elimizde uzaqmerzimdi baıqaýshy retinde bolady ári shtab-páteri Astanada ornalasady. Al referendým ótetin kúnge taman qysqa merzimdi baıqaýshylar keledi.

- Mıssııany TMD Bas hatshysynyń birinshi orynbasary Igor Petrıshenko basqarady. Ol referendým kúnine jaqyn ýaqytta keledi. Onyń kandıdatýrasy búgin Táýelsiz Memleketter Dostastyǵyna qatysýshy memleketterdiń Jarǵylyq jáne basqa da organdary janyndaǵy turaqty ókiletti ókilder keńesinde kelisildi, - dedi Evgenıı Kozıak.

Aıta keteıik, keshe Ortalyq referendým komıssııasy 21 sheteldik baıqaýshyny akkredıttedi.