Referendým: Tynyshtyq jáne daýys berý kúni saılaýshylarǵa qoıylǵan qandaı suraq úgit-nasıhat sanalady
ASTANA. KAZINFORM – Ortalyq referendým komıssııasynyń otyrysynda Mádenıet jáne aqparat vıtse-mınıstri Qanat Ysqaqov tynyshtyq jáne daýys berý kúni saılaýshylarǵa qoıylǵan qandaı suraq úgit-nasıhat sanalatyndyǵyn aıtty.
«Referendým týraly» Zańnyń 7-babynyń 4-tarmaǵyna sáıkes, referendýmnyń aldyndaǵy kúni jáne referendým ótkiziletin kúni kez kelgen úgit júrgizýge tyıym salynady. Bul rette, «úgit-nasıhat» uǵymynyń máni men mazmunyna súıene otyryp, referendýmǵa shyǵarylǵan suraqty saılaýshylardy «daýys beremin» ne «qarsymyn» dep daýys berýge ıtermeleıtin materıaldar úgit-nasıhat retinde qaralatyn bolady. Sonymen qatar, referendýmǵa bes kún qalǵanda, onyń ishinde «tynyshtyq» jáne daýys berý kúni, ıaǵnı 5 jáne 6 qazanda qoǵamdyq pikirge saýalnama, referendým nátıjeleriniń boljamdaryn, basqa zertteýlerdi, referendýmge shyǵarylǵan suraqqa qarsy nemese jaqtap daýys berýlerdi buqaralyq aqparat quraldarynda jáne onlaın-platformalarda jarııalaýǵa jol berilmeıdi», - dedi Qanat Ysqaqov.
Onyń atap ótýinshe, atalǵan tyıymdardy saqtamaǵany úshin Qazaqstan Respýblıkasynyń Ákimshilik quqyq buzýshylyq týraly kodeksiniń 102 jáne 120-baptarynda ákimshilik jaýaptylyq kózdelgen.
«Bul rette atalǵan buzýshylyqqa jol bergen jeke jáne zańdy tulǵalar, onyń ishinde áleýmettik jeli qoldanýshylary jaýapqa tartylýy múmkin. Óz kezeginde, buryn ınternet-resýrstarda ornalastyrylǵan úgit-nasıhat materıaldary, saıttyń basty betine shyǵarylmaı, burynǵy oryndarynda saqtalýy qajet. Olardy joǵaryǵa shyǵarýdy boldyrmaý úshin paıdalanýshylardyń kommentarııleri fýnktsııasyn óshirý usynylady. Sondaı-aq, referendým kúni, ótkizý talaptary, daýys berý tártibi jáne basqalary týraly túsindirme sıpattaǵy buryn ornalastyrylǵan aqparattyq materıaldar, jarnamalyq bannerlerdi qosa alǵanda, burynǵy oryndarynda qalýy qajet», - dedi vıtse-mınıstr.
