Referendým tabysty ótti eken dep bosańsýǵa bolmaıdy – Memleket basshysy

ULYTAÝ. QazAqparat – Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev reformalardyń mán-mańyzyn halyqqa túsindirý kerek ekenin aıtty, dep habarlaıdy QazAqparat tilshisi.

«Eń bastysy, bizdiń baǵdarymyzdy halyqtyń basym kópshiligi qoldap otyr. Azamattarymyz elimizde túbegeıli ózgeris bolatynyna senedi. Degenmen, referendým tabysty ótti eken dep, bosańsýǵa bolmaıdy. Naǵyz jumys endi bastaldy», - dedi Qasym-Jomart Toqaev.

Osy oraıda Prezıdent reformany júzege asyrý barysyn elge udaıy túsindirip otyrý kerek ekenin aıtty.

«Qazirdiń ózinde jańǵyrý úderisi birtindep jalpyulttyq sıpatqa ıe bola bastady. Shyn máninde, jańǵyrýdyń áserin árbir azamatymyz sezinýi qajet. Eldegi ózgeriske árkim óz isindeı qarasa, shyn máninde, jańarý jolyna túsemiz. Muny elimizdiń árbir azamaty tereń túsingeni jón», - dedi Memleket basshysy.