Referendým: Pavlodar oblysynda 505 myńnan astam azamat óz tańdaýyn jasaıdy

PAVLODAR. KAZINFORM -  AES qurylysy boıynsha respýblıkalyq referendýmda Pavlodar oblysynan 505 673 adam daýys berý quqyǵyna ıe.  Olarǵa 520 referendým ýchaskesi qyzmet kórsetedi.

Qazaqstanda AES salý jónindegi respýblıkalyq referendýmda Ertis-Baıan óńirinen 505 673 adam daýys berý quqyǵyna ıe. Bul týraly Pavlodar oblystyq aýmaqtyq referendým komıssııasynyń tóraǵasy Gúlnár Amanjolova habarlady.

«Oblys boıynsha referendým ýchaskelerinde daýys berýge jalpy sany 505 673 adam tirkelgen. Pavlodar oblysynyń aýmaǵynda 520 referendým ýchaskesi bar. Onyń bireýi - oblystyq, 13-i - aýmaqtyq, ózgesi - ýchaskelik komıssııalar. Bul komıssııalar quramynda 3430 adam qyzmet etedi. 30 ýchaskede kózi nashar kóretin 46 adamnyń braıl shrıftin qoldanýyna jaǵdaı jasalǵan», - dep atap ótti G.Amanjolova.

Buǵan qosa, 21 ýchaske azamattardyń ýaqytsha bolatyn oryndarynda daýys berýi úshin uıymdastyrylady. Keı azamattar densaýlyǵyna baılanysty úıden daýys berýdi qalasa, saǵat 12.00-ge deıin tıisti referendým ýchaskesine habarlasyp, ótinish qaldyra alady. Mundaı jaǵdaıda komıssııa ókilderi turǵynnyń úıine bıýlletendi alyp barady.