Referendým oıdaǵydaı ótti degen alǵashqy qorytyndy jasaýǵa bolady - almatylyq baıqaýshy

ALMATY. QazAqparat - Almatyda saılaý protsesi tıisti deńgeıde ótip jatyr. Bul týraly óńirlik kommýnıkatsııalar qyzmetiniń brıfınginde Almaty qalasy boıynsha baıqaýshylardyń kapıtany, «Qoǵamdyq joba» qoǵamdyq birlestiginiń dırektory Aleksandr Bratenkov aıtty, dep habarlaıdy QazAqparat tilshisi.

Spıkerdiń aıtýynsha, referendým joǵary deńgeıde uıymdastyrylyp, halyq belsendi qatysyp jatyr. Ol sondaı-aq búgingi saılaý protsessi jaıly óz oıyn bólisti.

«Saılaý protsesiniń toǵyz saǵaty ótken soń elimizde referendým ótti degen alǵashqy qorytyndy jasaýǵa bolady. Adamdar kelip, referendým ótkizýge qoldaý kórsetti. Ekinshi qorytyndy - Almaty qalasy elektoraldy uıqydan oıandy dese bolady. Sebebi, bizdiń málimet boıynsha keı aýdandarda ýchaskege halyqtyń 30%-dan astamy kelip, daýys bergen», - dedi A.Bratenkov.

Sondaı-aq ol bir ýchaskede komıssııa músheleriniń bir adamnyń eki bıýlletendi alǵanyna nazar aýdarmaǵanyn, atalmysh zańbuzýshylyqty táýelsiz baqylaýshylar aktilegenin málimdedi.

Sóz sońynda Aleksandr Bratenkov Alataý aýdany turǵyndarynyń elektoraldy belsendiligin atap ótti.