Referendým ótkizýge úgit kezinde Qazaqstan zańnamasyn buzýdyń 54 deregi anyqtaldy

ASTANA. KAZINFORM — Referendým ótkizýge úgit kezinde Qazaqstan zańnamasyn buzýdyń 54 deregi anyqtaldy. Bul týraly Ortalyq referendým komıssııasynyń otyrysynda Mádenıet jáne aqparat birinshi vıtse-mınıstri Qanat Ysqaqov aıtty. 

— Referendým ótkizý jarııalanǵan sátten bastap, quqyqtyq monıtorıng 68 respýblıkalyq BAQ pen 229 tanymal ınternet resýrsty qamtydy. Monıtorıng BAQ pen onlaın platformalardy paıdalanýshylardyń 3 negizgi talapty saqtaýyna qatysty júrgizildi.

Birinshi talap — anonımdi úgit materıaldy ornalastyrýǵa tyıym salý, ıaǵnı olardy shyǵarǵan uıym týraly, basylǵan orny men taralymy, sonymen qatar shyǵarýǵa jaýapty tulǵa týraly málimetter kórsetilmegen, tıisti tańbasy joq materıaldardy jarııalaýǵa jol bermeý.

Ekinshi talap — qoǵamdyq pikirge saýalnama júrgizý tártibine qoıylatyn talaptardy qatań saqtaý.

Úshinshi talap — konstıtýtsııalyq qurylysty kúshpen ózgertýge, respýblıkanyń tutastyǵyn buzýǵa, memlekettiń qaýipsizdigine nuqsan keltirýge, soǵysqa, áleýmettik násildik, dinı, jáne rýlyq artyqshylyqty nasıhattaýǵa, sondaı-aq qatigezdik pen zorlyq-zombylyqqa úgit júrgizýge jol berilmeıdi, — dedi ol.

Birinshi vıtse-mınıstrdiń aıtýynsha, úgit júrgizý kezine monıtorıng júrgizý barysynda «Respýblıkalyq referendým týraly» jáne «Saılaý týraly» zańdaryn buzýdyń 26 deregi anyqtaldy.

Onyń ishinde 24 buzýshylyq onlaın platformany paıdalanýshylar tarapynan oryn alsa, al 2 eki buzýshylyqty ınternet basylymdar jibergen. Barlyq anyqtalǵan zań buzý qoǵamdyq pikirge júrgizilgen saýalnamalar men olardyń nátıjelerin ornalastyrýǵa qatysty boldy. Atalǵan málimetter Bas prokýratýraǵa joldandy.

— Sonymen qatar úgit kezinde Qazaqstan zańnamasyn buzýdyń 54 deregi anyqtaldy. Atalǵan materıaldar boıynsha ýákiletti organ tarapynan onlaın platforma ıeleriniń atyna qarastyrý jáne tıisti sheshim qabyldaý úshin Іshki ister mınıstrligine jiberildi, — dedi Qanat Ysqaqov.

Aıta keteıik, referendým kúni qoǵamdyq pikirge saýal salý daýys berýge arnalǵan úı-jaıda nemese pýnktte ótkizilmeıdi.