Referendým ótkizýdi jaqtap daýys beretinder belgilengen mólsherden áldeqaıda kóp bolýy múmkin- Á. Eraly
ASTANA. 27 jeltoqsan. QazAqparat /Qanat Mámetqazyuly/ - Referendým ótkizýdi jaqtap daýys beretinder belgilengen mólsherden áldeqaıda kóp bolýy múmkin.
Búgin Astana qalalyq Qazaqstan halqy Assambleıasynyń uıymdastyrýymen ótkizilgen «N. Nazarbaev - ult birligi men Qazaqstannyń jarqyn bolashaǵynyń negizin qalaýshy» taqyrybyndaǵy jıyn barysynda «Til jáne mádenıet» qoǵamynyń tóraǵasy Ánýarbek Eraly osylaı málim etti.
Esterińizge sala keteıik, atalǵan jıyn QR Prezıdentiniń ókilettigin uzartý jóninde referendým ótkizý týraly bastamany qoldaý maqsatynda ótkizilip otyr.
«Qoldanystaǵy zańnamaǵa sáıkes, referendýmdy taǵaıyndaý úshin barlyq oblystardan 12,5 myńnan astam qol jınalýy, ıaǵnı 200 myń adamnyń qoly bolýy tıis. Alaıda, is júzinde bul odan áldeqaıda kóp bolýy múmkin. Óıtkeni, Elbasynyń júzege asyryp jatqan reformalaryna bir jaǵynan halyq razy bolsa, ekinshi jaǵynan aldaǵy asýlarymyz áli de asqaq. Sondyqtan, qolǵa alynǵan is aıaǵyna deıin jetýi kerek, halyq ta ózi qatysqan josparlardyń júzege asqanyn kórgisi keledi», - dedi Á. Eraly.
