Referendým ótkizý jónindegi bastamashyl top zańnamada kórsetilgen mólsherden de kóp qol jınaıtynyna senimdi
Búgin QR Ortalyq saılaý komıssııasynyń otyrysynda Qazaqstan Respýblıkasynyń Prezıdenti - Ult kóshbasshysy N.Á.Nazarbaevtyń prezıdenttik ókilettiligin 2020 jylǵy 6 jeltoqsanǵa deıin uzartý jónindegi referendýmnyń bastamashyl tobyn, sondaı-aq onyń respýblıkalyq referendýmǵa usynyp otyrǵan máselesin tirkeý týraly qaýly qabyldanǵannan keıin jýrnalısterge bergen suhbatynda bastamashyl top jetekshisi Erlan Sydyqov osylaı málim etti.
«Búginnen bastap 320 adamnan turatyn bastamashyl top qol jınaýǵa kirisedi. Bundaı sharany neǵurlym tezirek júzege asyrýǵa úmittimiz ári soǵan senimimiz mol. Zań boıynsha jınalatyn qol 200 myńnan kem bolmaýy shart. Bizdiń odan da kóp qol jınaýǵa múmkindigimiz barshylyq. Óıtkeni, búgin kóterilgen áńgime burynnan beri Qazaqstan halqynyń basym kópshiligiń oıynda, júreginde júrgen bastamasy», - dedi E. Sydyqov.
Onyń aıtýynsha, referendým týraly ıdeıa kóterilmes buryn, 7 adamnan qurylǵan bastamashyl top Qazaqstannyń birqatar aýmaqtaryn aralap shyqqan. Ártúrli áleýmettik top ókilderimen, pikirlesterimen júzdesip, osy máseleniń qoldaý tabatynyna kózderi jetken. «Sondyqtan da qoldaý búkil Qazaqstan boıynsha birdeı bolaryna senimimiz barshylyq», - dedi E. Sydyqov.
