Referendým nátıjesinde Prezıdent ókilettigine birqatar shekteý engiziledi

NUR-SULTAN. QazAqparat – QR Ádilet vıtse-mınıstri Alma Muqanova 5 maýsymda ótetin referendým nátıjesi boıynsha oń sheshim qabyldanǵan jaǵdaıda QR Prezıdentiniń ókilettigine birqatar shekteý qoıylatynyn málim etti, dep habarlaıdy QazAqparat tilshisi.

«Referendýmǵa shyǵarylyp jatqan konstıtýtsııalyq ózgeristerdiń ishinde qoǵamda keńinen talqylaýǵa túsip jatqan máseleniń biri – Prezıdenttiń laýazymyna baılanysty shekteýler. Ol degenimiz, aldymen, Prezıdenttiń jaqyn týystary úshin saıası laýazymdar men kvazımemlekettik sektorda basshylyq laýazymdardy atqarýǵa shekteý qoıylmaq. Ekinshiden, Prezıdenttiń óz ókilettikterin júzege asyrý kezeńinde saıası partııa múshesi bolýyna tyıym salynady», - dedi Alma Muqanova Ortalyq kommýnıkatsııalar qyzmeti alańynda ótken baspasóz máslıhatynda.

Mınıstr orynbasarynyń aıtýynsha, Konstıtýtsııaǵa engiziletin ózgerister 12 bloktan turady.

«Sonymen qatar Memleket basshysynyń aýdan, oblys, shaǵyn qalalar men aýyldyq okrýgterdiń ákimderin saılaý jáne bosatý quqyǵy alynyp tastalady. Kórip otyrǵanyńyzdaı, bul Prezıdent ókilettiliginiń qysqarýy degen sóz. ıAǵnı «sýperprezıdenttik» basqarý úlgisinen bas tartýdy bildiredi», - deıdi ol.

Eske salaıyq, bıyl 5 maýsymda QR Konstıtýtsııasyna birqatar ózgeris pen tolyqtyrý engizý boıynsha respýblıkalyq referendým ótedi. Referendým nátıjesimen 17 óńirdiń 11-i jaqtap daýys berse Konstıtýtsııaǵa ózgeris engiziletin bolady. Qazir elektorattyń tizimi jasaqtalyp jatyr. Alma Muqanovanyń aıtýynsha, referendým arqyly Konstıtýtsııaǵa barlyǵy 56 ózgeris engiziledi.