Referendým: Qyrǵyzstannan Qazaqstanǵa 15 halyqaralyq baıqaýshy keldi

NUR-SULTAN. QazAqparat – Qyrǵyzstannyń Ortalyq saılaý komıssııasynyń múshesi Ábdijapar Bekmatov Qazaqstanda referendým qalaı ótip jatqanyn aıtyp berdi, dep habarlaıdy QazAqparat tilshisi.

«Biz birneshe saılaý ýchaskesine bardyq. Onda saılaýshylar úshin, baıqaýshylar úshin barlyq jaǵdaı jasalǵanyn kórdik. Ásirese múgedektigi bar azamattarǵa jaǵdaı jasalǵanyn atap ótkim keledi. Barlyq saılaý ýchaskelerinde pandýstar, arnaıy kabınalar ornatylǵan. Bir sózben aıtqanda, referendýmnyń árbir qatysýshysy úshin qolaıly jaǵdaı qamtylǵan. Tańerteń ýchaskeniń ashylýynda boldyq jáne birneshe saılaý ornyna bardyq, referendýmǵa qatysýshylar óte belsendi. Ýchaskelerdiń birinde tirkelgen 2 myńnan astam qatysýshy bolsa, qazirdiń ózinde 100-den astam adam daýys berdi», - dedi Á. Bekmatov Nur-Sultanda ótken baspasóz máslıhatynda.

Spıkerdiń pikirinshe, búgin Qazaqstan halqy óz bolashaǵyn aıqyndaıdy. Qazaqstandyqtar jaýapkershilikti sezinip, referendýmǵa óte belsendi qatysyp jatyr.

Sonymen birge Qyrǵyzstannan kelgen 15 halyqaralyq baıqaýshy Nur-Sultan men Almaty qalalarynda, Jambyl jáne Almaty oblystarynda júrgeni atap ótildi.

Jalpy Ortalyq referendým komıssııasy halyqaralyq uıymdar men shet memleketterden 272 ókildi baıqaýshy retinde akkredıttegen.

Aıta keteıik, búgin elimizde respýblıkalyq referendým ótip jatyr. Referendým barysynda el turǵyndary Konstıtýtsııamyzdyń 33 babyna 56 ózgeris engizý máselesine qatysty óz daýysyn beredi.

Respýblıkalyq referendýmǵa qatysý quqyǵy bar azamattardyń tizimi 11 mln 722 myń 536 adamdy quraıdy. Sonymen qatar QR Syrtqy ister mınıstrligi 52 shet memlekettegi Elshilikterimizdiń janynan 65 ýchaskelik referendým komıssııasyn qurdy. Olarda shetelde júrgen Qazaqstannyń shamamen 11 350 azamaty daýys bere alady.

Osydan týra bir aı buryn QR Prezıdenti Qasym-Jomart Toqaev 5 maýsymda respýblıkalyq referendým ótkizý týraly Jarlyqqa qol qoıǵan edi.