Referendým kúninde azamattardan qansha ótinish tústi

ASTANA. KAZINFORM — Ortalyq referendým komıssııasynyń múshesi Ásel Janábilova jańa Kostıtýtsııa jobasy boıynsha referendým kúninde el azamattarynan qansha ótinish túskenin jarııa etti.

Komıssııamúshesiniń aıtýynsha, kelip túsken ótinishter respýblıkalyq referendým týraly zańnamany túsindirý, referendýmnyń máni, ony uıymdastyrý máseleleri, onyń ishinde ýchaskelik komıssııalardyń jumysy men sheteldegi daýys berý, sondaı-aq referendýmǵa qatysy joq ózge de máselelerge qatysty bolǵan.

— Aýmaqtyq referendým komıssııalarynyń málimetinshe, daýys berý kúni 35 ótinish tústi. Astanada — 11, Almatyda — 6, Mańǵystaý oblysynda — 4 ótinish. Shymkentte, Abaı oblysynda, Qyzylorda oblysynda — árqaısysynda 3 ótinishten. Almaty, Aqmola, Shyǵys Qazaqstan, Jambyl, Pavlodar oblystarynda — árqaısysynda 1 ótinishten tirkeldi. 33 ótinishke qoldanystaǵy zańnamaǵa sáıkes jaýap berildi, — dedi ol brıfıng barysynda.

Daýys berý qorytyndysy boıynsha aýmaqtyq referendým komıssııalaryna sot organdaryna 2 talap aryz berildi. Birinshisi Aqtóbe oblysyndaǵy Braıl qarpiniń oqylmaýy máselesine qatysty bolsa, ekinshisi Astanadaǵy ýchaskelik komıssııanyń baqylaýshyny shyǵarý týraly sheshimine qarsylyq bildirýge baılanysty. 

— Atalǵan talap aryzdardy qaraý nátıjesinde talapkerlerdiń ýájderi rastalmady. Osyǵan baılanysty sottar olardy qanaǵattandyrýdan bas tartty. Osylaısha, barlyq kelip túsken ótinish zańnamada belgilengen tártippen qaraldy. Keıbir ótinishter túsindirmelik nemese uıymdastyrýshylyq sıpatta boldy. Berilgen talap aryzdar sotta óz dálelin tappady. Jalpy alǵanda, atalǵan ótinishter men jekelegen eskertýler daýys berý barysyna jáne respýblıkalyq referendým nátıjelerin anyqtaýǵa aıtarlyqtaı áser etken joq, — dep qorytyndylady Ásel Janábilova.