Referendým kúni Prezıdenttiń Jarlyǵynda kórsetiledi – depýtat

NUR-SULTAN. QazAqparat – Májilis depýtaty Arman Qojahmetov aldaǵy respýblıkalyq referendýmdy ótkizý merzimine qatysty saýaldarǵa jaýap berdi, dep habarlaıdy QazAqparat tilshisi.

«Referendým 5 maýsymda ótedi degen boljam bar. Bul aqparat qanshalyqty ras?», - dep surady jýrnalıster Májilis otyrysynan keıingi suhbatta.

«Búgin nemese erteń Prezıdenttiń Jarlyǵy shyǵýy múmkin. Munyń bárin Jarlyqtan kóretin bolamyz. Árıne, bul da yńǵaıly kún. 5 maýsym – demalys», - dep jaýap berdi Arman Qojahmetov.

Sondaı-aq, depýtat jumys tobynyń el astanasyn qaıta ataý týraly usynys boldy ma degen suraqqa jaýap berdi.

«Jumys tobynda bul másele talqylanǵan joq. Biz naýryz aıynda Prezıdent Joldaýynda aıtylǵandardy basshylyqqa aldyq. Sondyqtan Prezıdent bergen tapsyrmalar nazarda boldy. Qosymsha bizdiń azamattarymyz, úkimettik emes uıymdar usynǵan barlyq usynys eskerildi. Osy túzetýlerdiń barlyǵyn biz birge talqyladyq», - dedi Arman Qojahmetov.

Aıta keteıik, búgin Májilis depýtattary «Respýblıkalyq referendým týraly» QR Konstıtýtsııalyq zańyna ózgerister men tolyqtyrý engizý týraly» QR Konstıtýtsııalyq zań jobasyna Senat engizgen tolyqtyrýmen kelisti.

Senatorlar engizgen tolyqtyrý boıynsha «Referendým týraly» Zańnan Elbasy týraly norma alynyp tastaldy.