Referendým kúni úgit pen saýalnama júrgizýge tyıym salynady — Bas prokýratýra
ASTANA.KAZINFORM — Qazaqstan Respýblıkasynyń Bas prokýratýrasy 15 naýryzda ótetin referendým qarsańynda azamattarǵa úndeý jasady.
Memleket basshysynyń Jarlyǵyna sáıkes 15 naýryzda «Jobasy buqaralyq aqparat quraldarynda 2026 jylǵy 12 aqpanda jarııalanǵan Qazaqstan Respýblıkasynyń jańa Konstıtýtsııasyn qabyldaısyz ba?» degen saýal boıynsha respýblıkalyq referendým ótedi.
Qazirgi ýaqytta azamattar men qoǵamdyq birlestikter tarapynan referendýmǵa baılanysty úgit jumystary júrgizilip jatyr (Qazaqstan Respýblıkasynyń «Respýblıkalyq referendým týraly» Konstıtýtsııalyq zańynyń 7-babynyń 1-tarmaǵy).
Konstıtýtsııalyq zańnyń 7-babynyń 4-tarmaǵyna jáne Referendýmdy daıyndaý jáne ótkizý jónindegi negizgi is-sharalardyń kúntizbelik josparyna saı úgit júrgizý 2026 jylǵy 14 naýryz saǵat 00:00–de aıaqtalady.
Bul rette referendým qarsańyndaǵy kúni men referendým ótkiziletin kúni, ıaǵnı 2026 jylǵy 14 jáne 15 naýryzda úgit júrgizýge tyıym salynady.
Sonymen qatar buqaralyq aqparat quraldarynda, onlaın-platformalarda qoǵamdyq pikirge saýal salý nátıjelerin, referendým nátıjelerine boljamdardy, referendýmǵa baılanysty ózge de zertteýlerdi jarııalaýǵa jol berilmeıdi.
— Referendým kúni daýys berýge arnalǵan úı-jaıda nemese pýnktte qoǵamdyq pikirge saýal salýdy júrgizýge tyıym salynady (Konstıtýtsııalyq zańnyń 7-1-baby jáne «Qazaqstan Respýblıkasyndaǵy saılaý týraly» Konstıtýtsııalyq zańnyń 28-babynyń 9-tarmaǵy).
Atalǵan quqyqtyq talaptardy buzǵan kináli tulǵalar ákimshilik jaýapkershilikke tartylady.
Naqty aıtqanda, 2026 jylǵy 14 jáne 15 naýryzda úgitti júrgizgeni úshin, ıaǵnı oǵan tyıym salynǵan kezeńde, Qazaqstan Respýblıkasynyń Ákimshilik quqyq buzýshylyq týraly kodeksiniń 102-baby boıynsha jaýaptylyq týyndaıdy.
Qoǵamdyq pikirge saýal salýdyń nátıjelerin jarııalaǵany nemese referendým kúni daýys berýge arnalǵan úı-jaıda nemese pýnktte ony júrgizgeni úshin ÁQBtK-niń 120-babynyń 2-bóligi boıynsha jaýapkershilik kózdelgen, — delingen habarlamada.
Mazmundalǵandy eskere otyryp, Qazaqstan Respýblıkasynyń Bas prokýratýrasy zańdylyqty qamtamasyz etý jáne quqyq buzýshylyqtardyń aldyn alý maqsatynda referendýmǵa qatysatyn barlyq azamattardy atalǵan zańnama talaptaryn qatań saqtaýǵa jáne quqyqqa qaıshy áreketterge jol bermeýge shaqyrady.
Aıta ketelik ІІM 15 naýryzda ótetin referendým qarsańynda azamattarǵa úndeý jasaǵan edi.
Sonymen qatar búgin úgit aıaqtalady. Sondaı-aq 15 naýryzda «Referendým – 2026» onlaın marafony ótedi.
