Referendým kúni taǵy bir qalada qoǵamdyq kólik tegin bolady

QONAEV. KAZINFORM – Qonaev qalasynda 15 naýryz kúni avtobýstar tegin júredi.

Qala ákimdigi bul kúni jańa Konstıtýtsııa jobasyna baılanysty respýblıkalyq referendým ótetindikten, barlyq baǵyttaǵy qoǵamdyq kólikterde jolaqy alynbaıtynyn málimdedi.

Eske salaıyq, buǵan deıin 15 naýryzda Almatynyń qoǵamdyq kólikterinde jol júrý tegin bolatynyn jazǵanbyz. Atap aıtqanda, avtobýs, trolleıbýs jáne metropolıten syndy qaladaǵy qoǵamdyq kóliktiń barlyq túrinde jolaýshylardan aqy alynbaıdy. Bul sheshim respýblıkalyq referendýmnyń ótkizilýine baılanysty qabyldandy.

Odan bólek Almatyda múgedektigi bar turǵyndar respýblıkalyq referendým ótetin kúni saılaý ýchaskelerine barý úshin «Invataksı» qyzmetin tegin paıdalana alady. 15 naýryzda 170 «Invataksı» avtokóligi qalada jumys isteıdi. «Invataksı» qyzmetine dıspetcherlik qyzmetterdiń telefon nómirleri arqyly tapsyrys berýge bolady.

Sondaı-aq Astanada 15 naýryz kúni qoǵamdyq kólik tegin qatynaıdy.