Referendým kúni aqtóbelikter qoǵamdyq kólikte tegin júredi

AQTÓBE. KAZINFORM - Referendým kúni Aqtóbe qalasynda avtobýsta tegin júrýge bolady. Qoǵamdyq kólik tańǵy saǵat 6:00-den bastap júredi.

Aqtóbe qalasy ákiminiń baspasóz qyzmetiniń habarlaýynsha, qalalyq qana emes, qala mańyndaǵy marshrýttarda jol júrý tegin bolady.

- Avtobýstar tańǵy 6:00-den bastap júredi. 7 qazannan bastap qoǵamdyq kólik shtattyq rejımde jumys isteıdi. Qala turǵyndary men qonaqtaryna “Avtopark”, “Qala trans”, “Aqjaıyq avtopark”, “Tabys Aqtóbe” jáne “RTT grýpp” JShS tasymaldaýshy kompanııalary qyzmet kórsetedi,- dep habarlady baspasóz qyzmeti.

Eske salsaq, 6 qazan kúni Túrkistan oblysynda qoǵamdyq kólikte jol júrý barlyq azamattar úshin tegin bolady.

Sondaı-aq, 167 aýyldyq eldi mekende turǵyndardy tekserý úshin jyljymaly medıtsınalyq pýnktter jumys isteıdi.