Referendým kúni 54 eldegi Qazaqstan azamattary daýys bere alady

ASTANA. KAZINFORM – Shet memleketterde 71 ýchaske ashyldy. Bul jóninde QR Syrtqy ister mınıstrliginiń Erekshe tapsyrmalar jónindegi elshisi Erlan Álimbaev málimdedi. 

– Taıaý Shyǵystaǵy áskerı-saıası jaǵdaıdyń shıelenisýine baılanysty jáne birqatar eldegi qaýipsizdik deńgeıiniń tómendigin eskerip, 10 eldegi ýchaskeniń jumysyn toqtatý týraly sheshim qabyldandy. Osylaısha, referendým kúni 54 eldegi Qazaqstan Respýblıkasynyń shetelderdegi ókildikteri janynan 71 ýchaske jumys isteıdi, - dedi E. Álimbaev.

Sondaı-aq ol shetelderde daýys beretin Qazaqstan azamattarynyń sany 14 230 adam ekenin atap ótti.

– Shetelderde referendým komıssııalary quryldy. Olardyń barlyq múshesi «Respýblıkalyq referendým týraly» QR konstıtýtsııalyq zańy jáne adam quqyqtary men qajettilikterin bilý boıynsha arnaıy testileýden ótti. Sertıfıkattar usynyldy. Shetelde referendým ótkizý tártibi boıynsha onlaın oqytý semınary ótkizildi. Osylaısha, barlyq ýchaskelik komıssııanyń daıyndyǵy bar dep aıta alamyz, - dedi Syrtqy ister mınıstrliginiń Erekshe tapsyrmalar jónindegi elshisi.

Sonymen birge ol referendým boıynsha aqparattyq materıaldar, saılaý jáshikteri, referendým jáshikteri, bıýlletender búgin-erteń shetelderdegi komıssııalarǵa joldanatynyn aıtty. 

Odan bólek E. Álimbaev referendým kúni 31 shet memlekettiń 68 BAQ-ynyń 185 qyzmetkeri aqparat taratatynyn atap ótti.

Aıta keteıik, buǵan deıin respýblıkalyq referendýmge 359 halyqaralyq baıqaýshy tirkelgenin jazǵanbyz.