Referendým kúni 10 myńnan astam ýchaske jumys isteıdi

ASTANA. KAZINFORM — Otandastarymyz 10 402 ýchaskede daýys bere alady. Bul jóninde QR Ortalyq saılaý komıssııasynyń Tóraǵasy Nurlan Ábdirov málimdedi.

Onyń sózinshe, jaýapty mamandar elimizdiń 20 óńirine de baryp, ýchaskelik komıssııalardyń jumysymen jáne referendýmdy uıymdastyrý barysymen tanysqan.

— Daýys berý ýchaskeleriniń materıaldyq-tehnıkalyq daıyndyǵy, ınfraqurylymdyq jáne aqparattyq qamtamasyz etý máseleleri belgilengen talaptarǵa sáıkes uıymdastyrylyp jatyr. Sapar barysynda anyqtalǵan jekelegen tehnıkalyq jáne uıymdastyrýshylyq máseleler sol jerde pysyqtalyp, olardy sheshý boıynsha tıisti sharalar qabyldandy, — dedi N. Ábdirov.

Al QR Syrtqy ister mınıstrliginiń Erekshe tapsyrmalar jónindegi elshisi Erlan Álimbaev referendým kúni 54 shetelde 70-ten astam ýchaske jumys isteıtinin málimdedi.

— Taıaý Shyǵystaǵy áskerı-saıası jaǵdaıdyń shıelenisýine baılanysty jáne birqatar eldegi qaýipsizdik deńgeıiniń tómendigin eskerip, 10 eldegi ýchaskeniń jumysyn toqtatý týraly sheshim qabyldandy. Osylaısha, referendým kúni 54 eldegi Qazaqstan Respýblıkasynyń shetelderdegi ókildikteri janynan 71 ýchaske jumys isteıdi, — dedi E Álimbaev.

Sondaı-aq ol shetelderde daýys beretin Qazaqstan azamattarynyń sany 14 230 adam ekenin atap ótti.

Aıta keteıik buǵan deıin referendýmnyń bekitý kýáligin qalaı alýǵa bolatynyn jazǵanbyz.