Referendým qoǵamnyń saıası belsendiligin kórsetti – sarapshy
ASTANA. KAZINFORM – Qazaqstanda ótken referendým qorytyndylary qoǵamnyń joǵary belsendiligin jáne bul oqıǵanyń eldiń saıası ómirindegi mańyzyn kórsetti. Bul týraly KazInform agenttiginiń tilshisine Ońtústik Kavkaz saıasattanýshylar klýbynyń basshysy Ilgar Velızade málim etti.
Sarapshynyń aıtýynsha, referendýmnyń ózi jáne Konstıtýtsııanyń jańa redaktsııasy tóńiregindegi keń aýqymdy qoǵamdyq talqylaýlar qazaqstandyq qoǵamnyń saıası úderisterge belsendi túrde ún qatatynyn ańǵartady.
Daýys berýdiń alǵashqy qorytyndylaryna toqtalǵan ol referendýmnyń eldiń saıası ómirindegi mańyzdy kezeń bolǵanyn atap ótti.
– Bul Qazaqstannyń saıası ómirindegi mańyzdy kezeń. Konstıtýtsııanyń jańa redaktsııasy boıynsha daýys berý jáne referendým aldyndaǵy aptalarda ótken qyzý pikirtalastar qoǵamnyń bolyp jatqan úderisterge sergek ári belsendi qaraıtynyn kórsetti, – dedi Ilgar Velızade.
Onyń sózinshe, daýys berýge qatysýdyń joǵary deńgeıi azamattardyń el bolashaǵyna beıjaı qaramaıtynyn bildiredi.
– Konstıtýtsııa – memlekettiliktiń jáne ınstıtýttardyń damýynyń negizi. Sondyqtan azamattardyń daýys berýge qatysýy olardyń eldiń qaı baǵytta damıtynyn túsinetinin kórsetedi, – dedi sarapshy.
Sondaı-aq ol Konstıtýtsııa jobasynyń buqaralyq aqparat quraldary men áleýmettik jelilerde keńinen talqylanǵanyna nazar aýdardy.
– Pikirtalastar óte qyzý ótti, keıde tipti tartysty boldy. Biraq bul bir nárseni kórsetedi – adamdar beıjaı qalmaı, el bolashaǵyn talqylaýǵa belsendi qatysty, – dedi ol.
Sarapshynyń pikirinshe, Konstıtýtsııanyń jańa redaktsııasyn qabyldaý el úshin jańa saıası kezeńniń bastalýyna jol ashady. Bul – memlekettik ınstıtýttardy nyǵaıtýǵa, saıası júıeniń turaqtylyǵyn arttyrýǵa jáne Qazaqstannyń halyqaralyq pozıtsııasyn kúsheıtýge baǵyttalǵan aýqymdy transformatsııa.
– Azamattar daýys berý kezinde tek búgingi kúndi ǵana emes, bolashaqty – óz balalary men keler urpaqty da oılady. Sondyqtan bul tańdaý erekshe mańyzǵa ıe, – dep qosty Ilgar Velızade.
Sonymen qatar sarapshy reformalardyń naqty baǵasy jańartylǵan Konstıtýtsııa normalary is júzinde júzege asyrylǵan saıyn qalyptasatynyn atap ótti.
– Degenmen, qazirdiń ózinde daýys berý barysy men onyń nátıjeleri qoǵamnyń joǵary azamattyq jaýapkershiligin jáne eldiń progressıvti bolashaǵyna degen qyzyǵýshylyǵyn kórsetti, – dep túıindedi ol.
Aıta keteıik, Ortalyq referendým komıssııasy jańa Konstıtýtsııa qabyldandy dep tanydy.