Referendým Qazaqstan úshin jańa tarıhı kezeńdi ashady – Ózbekstan OSK tóraǵasy
ASTANA. KAZINFORM — Qazaqstanǵa halyqaralyq baıqaýshy retinde kelgen Ózbekstan Ortalyq saılaý komıssııasynyń tóraǵasy Zaınıddın Nızamhodjaev referendýmǵa daıyndyq pen daýys berý barysyn joǵary baǵalady. Onyń aıtýynsha, delegatsııa jumysyn elge kelgen boıda, ıaǵnı keshe bastaǵan.
— Biz keshe keldik. Kelgennen keıin birden referendým ótkizý jónindegi Ortalyq komıssııanyń tóraǵasymen jáne múshelerimen ekijaqty kezdesý ótkizdik. Daıyndyq barysyna qatysty barlyq suraǵymyzǵa jan-jaqty jaýap aldyq, — dedi ol.
Baıqaýshy ózbekstandyq tarap naýqandy uıymdastyrýdyń barlyq kezeńine, sondaı-aq qysqa ýaqyt ishinde atqarylǵan jumystarǵa erekshe nazar aýdarǵanyn atap ótti. Onyń sózinshe, osy kezdesýdiń ózinde delegatsııa uıymdastyrýshylardyń daıyndyq deńgeıi týraly naqty túsinik qalyptastyrǵan.
— Áriptesterimiz barlyq suraqqa tolyq jaýap berdi. Sol sebepti referendýmdy ótkizýge jaýapty toptyń tolyq daıyn ekenine kóz jetkizdik, — dep atap ótti ol.
Sonymen qatar Zaınıddın Nızamhodjaev búgingi daýys berýdiń el úshin mańyzy zor ekenin aıtty. Onyń pikirinshe, bul referendým — Qazaqstannyń saıası ómirindegi mańyzdy oqıǵa.
— Búgin ótip jatqan referendým — Qazaqstan úshin jańa tarıhı beles, eldiń jańa bolashaǵynyń bastaýy, — dedi ol.
Kóp jyldan beri saılaý júıesinde eńbek etip kele jatqan maman retinde ol júrgizilgen daıyndyq jumystarynyń aýqymy men sapasynyń aıqyn kórinip turǵanyn erekshe atap ótti.
— Saılaý komıssııasynyń basshysy retinde áriptesterimizdiń óte aýqymdy daıyndyq jumystaryn júrgizgeni meni qýantady. Bul búgin anyq kórinip tur, al biz sonyń kýási bolyp otyrmyz, — dedi Zaınıddın Nızamhodjaev.
Baıqaýshynyń aıtýynsha, ýchaskelerdi aralaý barysynda delegatsııa komıssııalardyń uıymdasqan jumysyn ǵana emes, azamattardyń belsendi qatysýyn da baıqaǵan. Onyń sózinshe, ýchaskelerdegi jalpy ahýal da nazar aýdartqan.
— Saılaý komıssııalaryndaǵy jas músheler men qoǵamdyq baqylaýshylar bizdi qýantady. Olardyń belsendiligi jaǵymdy áser qaldyrdy, — dedi ol.
Ózbekstan ókiliniń baǵalaýynsha, kúnniń alǵashqy jartysynda-aq saılaýshylardyń belsendiligi aıqyn baıqalǵan.
— Bizdi qýantatyny — saǵat 12-ge deıin birneshe ýchaskeni aralap úlgerdik, sol ýaqytqa deıin saılaýshylardyń 40 paıyzdan astamy kelip, óz daýysyn berip úlgergen, — dedi ol.
Baıqaýshy delegatsııa tek saılaýshylardyń kelý kórsetkishine ǵana emes, barlyq rásimniń saqtalýyna da erekshe nazar aýdarǵanyn aıtty. Onyń sózinshe, ýchaskelerde halyqaralyq baıqaýshylar komıssııa ókilderine saılaýshylar sany, halyqty habardar etý tártibi, sondaı-aq ýchaskege ózderi kele almaıtyn azamattar úshin daýys berý qalaı uıymdastyrylǵany jóninde naqty suraqtar qoıǵan.
— Biz úshin qansha saılaýshy bar ekeni, olardy qalaı habardar etkeni, múgedektigi bar azamattar men syrqattanyp, úıinen shyǵa almaıtyn adamdar úshin qandaı jaǵdaı jasalǵany mańyzdy, — dep túsindirdi Zaınıddın Nızamhodjaev.
Baıqaýshy daýys berýdiń qoljetimdiligi máselesine de arnaıy toqtaldy. Onyń aıtýynsha, komıssııa ókilderi aldyn ala ótinish bergen azamattar úshin úıde daýys berý qalaı uıymdastyrylǵany týraly da málimet bergen.
— Mysaly, bir ýchaskede úsh adam úıden daýys berip úlgergen — olar aldyn ala ótinish tapsyrǵan, bul zańnamada qarastyrylǵan. Al keıbir ýchaskede jeti adam. Taǵy bir ýchaskede 12 azamat úıde daýys berý úshin ótinish bergenin óz kózimizben kórdik, — dedi Zaınıddın Nızamhodjaev.
Onyń pikirinshe, bul daýys berý rásimi ártúrli sanattaǵy azamattardyń jaǵdaıy eskerilip uıymdastyrylǵanyn kórsetedi.
— Referendýmdy Qazaqstan zańnamasynyń talaptaryna saı ótkizý úshin barlyq jaǵdaı jasalǵan, — dep atady spıker.
Jalpy daýys berý barysyna toqtalǵan Ózbekstan ókili delegatsııa baqylaýy barysynda eshqandaı zańbuzýshylyq tirkelmegenin aıtty.
— Bizdiń baıqaýymyzsha, eshqandaı zań buzý bolǵan joq, — dedi ol.
Sonymen qatar ol komıssııa músheleriniń baqylaýshylar tarapynan qoıylǵan suraqtarǵa ashyq ári tolyq jaýap bergenin erekshe atap ótti.
— Aıta ketý kerek, komıssııa tóraǵasy, hatshylar jáne barlyq komıssııa músheleri biz qoıǵan suraqtardyń bárine tolyq jaýap berdi, — dedi baqylaýshy.
Sóz sońynda ol Qazaqstan azamattaryna óz tilegin bildirdi.
— Aqyldy, parasatty qazaq halqyna óz tańdaýyn jasaýyn tileımin, — dedi Zaınıddın Nızamhodjaev.
Aıta ketelik anhaı Yntymaqtastyq Uıymy bas hatshysynyń orynbasary Oleg Kopylov Qazaqstandaǵy referendým ashyq, ádil jáne ınklıýzıvti ótip jatqanyn aıtty.
