Referendým qarajatynyń biraz bóligi materıaldyq-tehnıkalyq jasaqtaýǵa jumsalady

NUR-SULTAN. QazAqparat - Referendým ótkizýge baǵyttalatyn qarajattyń 21 paıyzy ýchaskelerdiń materıaldyq-tehnıkalyq jasaqtalýyna, referendým komıssııasynyń jumysyna jumsalady. Bul týraly QR Ortalyq saılaý komıssııasynyń múshesi Sábıla Mustafına málim etti, dep habarlaıdy QazAqparat tilshisi.

«Bul somanyń 21 paıyzy daýys berý ýchaskeleriniń metarıaldyq-tehnıkalyq qamtamasyz etilýine, Ortalyq referendým komıssııasy men ýchaskelik ári aýmaqtyq komıssııasynyń jumysyna, baspa ónimderin daıarlaýǵa, aqparattyq súıemeldeýge, sondaı-aq el aýmaǵynda arnaıy bılbordtardy ornalastyrýǵa arnalǵan», - dedi S. Mustafına OSK-da ótken baspasóz máslıhatynda.

Budan buryn habarlanǵandaı, QR Premer-Mınıstriniń orynbasary – Qarjy mınıstri Erulan Jamaýbaev konstıtýtsııalyq reformaǵa qatysty ótetin respýblıkalyq referendým ótkizýge qansha qarajat bólingenin aıtty.

«Konstıtýtsııalyq referendým ótkizýge respýblıkalyq bıýdjetten 16 mlrd 400 mln teńge bólinedi. Ortalyq saılaý komıssııasy tıisti esep-qısapty usyndy. Búgin Úkimet osyǵan baılanysty Qaýly qabyldady. Qarjy respýblıkalyq bıýdjetten, Úkimet rezervinen bólinedi», - dedi E. Jamaýbaev.