Referendým eshqandaı quqyq buzýsyz ótip jatyr — TúrkPA Bas hatshysy

ASTANA. KAZINFORM — Daýys berý barysynda Halyqaralyq quqyq pen «Qazaqstan Respýblıkasyndaǵy saılaý týraly» zańǵa qaıshy faktiler tirkelgen joq. Bul jóninde Túrki memleketteriniń Parlamenttik Assambleıasy (TúrkPA) bas hatshysy Ramıl Sagıb ogly Gasan málimdedi. 

Onyń sózinshe, atalǵan uıymnyń 23 ókili halyqaralyq baıqaýshy retinde Astana, Almaty jáne Túrkistan qalalarynda referendýmnyń ótý barysyn baqylap júr.

— Tańǵy 07:00–den bastap atalǵan úsh shahardaǵy 45 ýchaskeni aralap, jumysyn baqyladyq. Halyqaralyq quqyqqa jáne «Qazaqstan Respýblıkasyndaǵy saılaý týraly» zańǵa saı kelmeıtin eshqandaı quqyqbuzýshylyqty baıqaǵan joqpyz, — dedi Ramıl Sagıb ogly Gasan.

Sondaı-aq ol TúrkPA baıqaýshylarynyń arasynda Ázirbaıjan jáne Túrkııa Parlamentteriniń depýtattary men dıplomattar bar ekenin atap ótti.

— Qazaqstan halqy saıası naýqanǵa erikti ári belsendi túrde qatysyp, daýys berip jatyr. Referendýmdy keshki 20:00–ge deıin baqylaımyz. Barlyq ýchaske jumysyn aıaqtaǵan soń, daýystardy sanaý barysyn da qadaǵalaımyz. Erteńgi baspasóz konferentsııasyna qatysyp, taǵy esep beremiz, — dep túıindedi halyqaralyq baıqaýshy.

Aıta keteıik buǵan deıin Tájikstandaǵy qazaqstandyqtar referendýmda belsendilik tanytyp jatqanyn jazǵanbyz.