Referendým demokratııalyq ózgerister júıesin jetildire túsedi – reseılik sarapshy

NUR-SULTAN. QazAqparat – Qazaqstanda ótip jatqan respýblıkalyq referendým demokratııalyq ózgerister júıesin jetildire túsedi. Bul pikirdi Reseı ortalyq saılaý komıssııasynyń múshesi Elmıra Haımýrzına aıtty, dep habarlaıdy QazAqparat tilshisi.

«Meniń ájem bar ómirin Qazaqstanda ótkizgen jáne osynda jerlengen, ol «Alystaǵy aǵaıynnan janyńdaǵy kórshiń artyq» dep únemi aıtyp otyratyn. Reseı Federatsııasy úshin Qazaqstan – eń jaqyn kórshi. Qazaqstan men Reseı arasynda álemdegi eń uzyn qurlyq shekarasy jatyr jáne meniń oıymsha, eń izgi qarym-qatynas bar. Osy referendýmnan keıin Qazaqstan anaǵurlym demokratııashyl bola ma degen suraqqa kelsek... menińshe, Qazaqstan sońǵy 30 jyl boıy – KSRO transformatsııalanyp, álemniń geosaıası kartasynda jańa memleketter paıda bolǵan sátten bastap demokratııalyq model quryp keledi. Menińshe, bul referendým osy elde bolyp jatqan demokratııalyq ózgerister júıesin odan ári jetildire túsedi», - dedi ol Nur-Sultanda ótken baspasóz máslıhatynda.

Spıker óziniń Soltústik Qazaqstan oblysynyń týmasy ekenin atap ótti.

«Qazaqstanda árqashan bostandyqsúıgish, myqty adamdar ómir súrgen, olar neni qalaıtynyn jáne qalaı ómir súrgisi keletinin naqty túsinedi. Búgingi referendýmǵa da Qazaqstannyń kásibı jáne jaýapty daıyndalǵanyn atap ótken jón», - dedi E. Haımýrzına.

Aıta keteıik, saǵat 18.00-degi jaǵdaı boıynsha elimizde referendýmda 7 624 641 adam daýys bergen. Bul - tizimge engizilgen azamattardyń 65,04 paıyzy.