Referendým bıýlleteninde eki jaýap qana bolady – Arman Qojahmetov
«Prezıdent Jarlyǵy Konstıtýtsııaǵa engiziletin túzetýlerdiń nysany men mátinin usynady. Azamattar óz sheshimderin shyǵarady. Olar «Iá» nemese «Joq» dep daýys bere alady. Bıýlleten formasynda «ıá» nemese «joq» degen qysqa jaýaptar ǵana bolady. Túzetýler mátini elimizdiń barlyq azamattaryna jetkizilýi tıis. Biz olarmen tanysyp, sodan keıin referendýmda tıisti sheshim qabyldaýymyz kerek», - dep túsindirdi depýtat Májilis otyrysynan keıin tilshilerge.
Májilis depýtatynyń aıtýynsha, halyq referendýmǵa úlken qyzyǵýshylyq tanytady.
«Referendýmnyń sheshimi zańdy, óıtkeni ol tıisti zańda solaı jazylǵan. Biz áleýmettik jelilerde kórip otyrǵan usynystar men belsendilikke qarasaq, Konstıtýtsııaǵa túzetýler engizý máselesi qoǵamymyzdyń kóptegen azamattaryn tolǵandyrady. Sondyqtan, qyzyǵýshylyq úlken bolady dep oılaımyn», - dedi A.Qojahmetov.
Depýtat bul túzetýlerde Elbasy mártebesi týraly jáne Tuńǵysh Prezıdenttiń táýelsiz Qazaqstan memleketiniń negizin qalaýshy ekendigi týraly sózder alynyp tastalatynyn eske saldy.
Sonymen birge, tilshiler «Tuńǵysh Prezıdent – Elbasy týraly» zańnyń kúshin joıýy múmkin be degen suraq qoıdy.
«Iá dep oılaımyz, qujattar paketinde qarastyrylǵan. Biraq sheshimdi turǵyndar referendýmda qabyldaıdy. Eger bul úshin qoǵam daýys berse, tıisinshe, mundaı sheshim odan ári qabyldanatyn bolady», - dedi Arman Qojahmetov.
Onyń aıtýynsha, Prezıdenttiń Konstıtýtsııaǵa usynystar daıyndaý jónindegi jumys tobyn qurý tapsyrmasynan keıin Májilistiń Zańnama jáne sot-quqyqtyq reforma komıteti referendým máselelerin retteıtin qoldanystaǵy zańnamany qolǵa aldy.
«Respýblıkalyq referendým týraly zańnyń 28-baby boıynsha jumysty bastadyq. Biz bıýlletenniń formasyn suradyq jáne keıin daýys sanaý kezinde qıyndyqtar týyndaýy múmkin ekenin kórdik. Sondyqtan osyndaı túzetý boldy, ıaǵnı bul bizdiń depýtattarymyzdyń, bizdiń komıtettiń bastamashyl zań jobasy. Olar tıisti túzetýler jasap, Parlament Májilisine usyndy», - dedi depýtat.
