Referendým ashyq, ádil jáne ınklıýzıvti ótip jatyr – Oleg Kopylov
ASTANA. KAZINFORM – Qazaqstandaǵy referendým ashyq, ádil jáne ınklıýzıvti ótip jatyr. Bul týraly Shanhaı Yntymaqtastyq Uıymy (ShYU) Bas hatshysynyń orynbasary Oleg Kopylov málimdedi.
Onyń aıtýynsha, daýys berýge múmkindik barlyq azamattar úshin, sonyń ishinde múmkindigi shekteýli adamdar úshin de tolyq qamtamasyz etilgen. Arnaıy shrıft qoldanylyp, Konstıtýtsııa mátini aýdıo arqyly oqylady. Saılaý ýchaskelerinde pandýstar ornatylǵan.
– Biz oblysqa shyǵyp, saılaý ýchaskelerin aralap kórdik. Barlyq ýchaskelerde daıyndyq joǵary deńgeıde, bul úlken eńbek pen kásibı uıymdastyrýdyń nátıjesi, – dedi Kopylov.
Mıssııa quramynda 17 baıqaýshy bar, olardyń ishinde zań shyǵarýshy organdar men Ortalyq saılaý komıssııalarynyń ókilderi, sondaı-aq Qazaqstanda akkredıttelgen dıplomattar bar. Referendým aıaqtalǵan soń baıqaýshylar birigip baqylaý nátıjeleri týraly málimdeme jasaıdy.
– Aldyn ala baqylaýlarǵa súıene otyryp, Qazaqstan tarapynyń referendýmdy uıymdastyrýdaǵy eńbegin atap ótýge bolady. Halyq belsendi qatysyp jatyr, saılaý ýchaskelerinde jaǵymdy atmosfera baıqalady. Adamdar otbasymen, balalarymen birge daýys berip jatyr, jastar da belsendi, – dedi ol.
ShYU baıqaýshylar mıssııasy referendýmnyń Qazaqstandaǵy demokratııalyq prıntsıpterdi nyǵaıtýǵa jáne zań ústemdigin qamtamasyz etýge úles qosatynyna senim bildirdi.
– Ashyq, ádil jáne ınklıýzıvti referendýmdy halyqaralyq standarttarǵa sáıkes ótkizý eldiń turaqty damýy men órkendeýiniń kepili,– dep qorytyndylady Oleg Kopylov.
Aıta keteıik, qazir elimizdegi jáne shet elderdegi barlyq ýchaskede daýys berý júrip jatyr.
