Referendým arqyly Parlament pen máslıhattardyń róli kúsheıedi – senator

JEZQAZǴAN. QazAqparat - Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń depýtaty Rysqalı Ábdikerov Jezqazǵan qalasynyń turǵyndarymen kezdesti, dep habarlaıdy QazAqparat.

QR Parlamenti Senaty baspasóz qyzmetiniń habarlaýynsha, kezdesý barysynda senator Konstıtýtsııaǵa ózgerister men tolyqtyrýlar engizý jónindegi aldaǵy respýblıkalyq referendýmdy talqylady.

Senator aldaǵy oqıǵanyń mańyzyna toqtala kelip Memleket basshysy Qasym-Jomart Toqaevtyń bastamasymen qolǵa alynǵan jańa Qazaqstannyń qurylysy saıası reformasyz júzege asýy múmkin emestigin atap ótti.

«Jańa úlgide ósip-órkendeý boıynsha Parlament pen máslıhattardyń róli aıtarlyqtaı kúsheıe túsedi, azamattardyń memlekettiń tynys-tirshiligine qatysýy aıtarlyqtaı keńeıedi, quqyq qorǵaý salasy júıeli túrde nyǵaıa túsedi. Referendýmǵa qatysý árbir azamattyń konstıtýtsııalyq quqyǵyn iske asyrýdyń kepili bolyp tabylady jáne bul oraıda qoǵam qaıratkerleri men belsendilerge mańyzdy ról beriledi», - dep atap ótti Rysqalı Ábdikerov.

Senator sondaı-aq qala ákimdiginde de boldy. Aktıv aldynda sóz alǵan ol Konstıtýtsııaǵa engiziletin túzetýler Táýelsiz Qazaqstan tarıhynda ádil memleket qurýdyń jańa kezeńiniń bastaýy bolatynyn atap ótti.