Referendým aldynda jalǵan vıdeomaterıaldar tarap jatyr
ASTANA. KAZINFORM - Jalǵan aqparatqa qarsy is-qımyl ortalyǵy áleýmettik jelilerde saılaý jáshikterine bıýlletenderdi zańsyz tastaýdyń «dáleli» retinde usynylǵan beınerolıkterdiń taratylýyn tirkep jatyr.
Qazaqstan Respýblıkasy Prezıdenti janyndaǵy Ortalyq kommýnıkatsııalar qyzmetiniń Jalǵan aqparatqa qarsy is-qımyl ortalyǵynyń (JAQ) resmı arnasynyń habarlaýynsha, júrgizilgen taldaý nátıjesi kórsetkendeı, mundaı beınejazbalardyń basym bóligi basqa memleketterde jáne ártúrli ýaqyt kezeńderinde túsirilgen. Sonymen qatar, olardyń arasynda naqty shyǵý tegi men mán-jaıy kórsetilmeı taratylyp jatqan qoıylymdyq nemese modıfıkatsııalanǵan beınerolıkter bar.
Máselen, «joǵalyp ketetin sııa» beınelengen rolık alǵash ret ınternet keńistiginde 2019 jyly paıda bolǵan. Bul materıal buǵan deıin Reseı, Ýkraına jáne Qyrǵyzstan elderinde birneshe márte jarııalanyp, keńinen taralǵan bolatyn.
Al ózge materıaldardyń bir bóligi - osydan 10-15 jyl buryn jáne odan da erte ýaqytta jarııalanǵan beınejazbalar.
Ortalyq barlyq onlaın-platformalarda olardyń nusqalaryn estemegende, 32 biregeı beınejazbany anyqtady.
- Mundaı materıaldardy paıdalaný - aqparattyq arandatýshylyq tehnologııalarynyń biri bolyp tabylady. Maqsat - daýys berý protsedýralary týraly burmalanǵan túsinik qalyptastyrý arqyly referendým qarsańynda qoǵamdaǵy senim deńgeıine nuqsan keltirý,-delingen habarlamada.
Osy sebepti jalǵan aqparatqa qarsy is-qımyl ortalyǵynyń baǵalaýy boıynsha, referendým kúni jaqyndaǵan saıyn manıpýlıatsııalyq kontenttiń anaǵurlym kúrdeli túrleri, sonyń ishinde shynaıy oqıǵalardy nemese laýazymdy tulǵalardyń málimdemelerin ımıtatsııalaıtyn dıpfeık-beıneler paıda bolýy múmkin.
Ortalyq azamattardy mundaı jarııalanymdarǵa synı turǵydan qaraýǵa, aqparat kózderin muqııat tekserýge jáne rastalmaǵan materıaldardy taratpaýǵa shaqyrady.
- Qazaqstan Respýblıkasynyń quqyq qorǵaý organdary aqparattyq keńistikke turaqty monıtorıng júrgizedi. Kórineý jalǵan aqparatty ádeıi taratý qoldanystaǵy zańnamaǵa sáıkes quqyqtyq jaýapkershilikke ákep soǵatynyn eskertemiz, - dep málim etti ortalyq ókilderi.
Osyǵan deıin Almatyda jańa Konstıtýtsııaǵa qatysty feık taratqan turǵyn jazalanǵany týraly jazdyq.