Referendým: Aqtóbede 6 jańa ýchaske quryldy

AQTÓBE. KAZINFORM - Aqtóbe oblysy boıynsha 530 referendým ýchaskesi bar. Halyq sanynyń ósýine baılanysty onyń altaýy jańadan qurylǵan.

Aqtóbe oblysyndaǵy referendým ýchaskeleri 6 qazanǵa daıyn. Óńirde barlyǵy 530 referendým ýchaskesi bolsa, onyń 14-i azamattardyń ýaqytsha bolatyn orny.

«Halyq sany ósip, 6 ýchaske jańadan quryldy. Barlyq ýchaske 16 qyrkúıekten bastap jumys istep tur. Qazirgi kezde Referendýmda daýys berý quqyǵy bar 569 845 adam tizimge engen. Onyń 303-ine esepten shyǵarý kýáligi berildi. Bul azamattardyń ótinishi. Olar ózge oryndarda daýys beredi. Al erekshe qajettiligi bar azamattar úshin ýchaskelerde trafaret bar. Kóre almaıtyn azamattar aýdıonusqany tańdap, bıýlletendi ózi toltyra alady. Al 178 ýchaskede braıl qarpi qoldanylady», - dedi Aqtóbe oblystyq aýmaqtyq referendým komıssııasy tóraǵasynyń orynbasary Aqmaral Nurmaǵambetova.

Aıta keteıik, Aqtóbe qalasynda 29, al 12 aýdanda 15 ınvataksı qyzmeti uıymdastyrylady. Múgedektigi bar azamattardyń qoǵamdyq uıymdary 16 sýdroaýdarmashylardyń kómegin usynady.

Eske salsaq, 6 qazan kúni Aqtóbe qalasynda qoǵamdyq kólikter tegin qyzmet kórsetedi. Avtobýstar tańǵy saǵat 6:00-den bastap júredi.