Referendým: 24 adam ákimshilik jaýapkershilikke tartyldy

ASTANA. KAZINFORM – Búgin elordada TMD baıqaýshylary mıssııasynyń jetekshisi Leonıd Anfımov 6 qazan kúni Qazaqstanda ótken referendýmǵa qatysty pikir aıtty.

«TMD baıqaýshylary mıssııasynyń suraýy boıynsha QR Ortalyq saılaý komıssııasy, Joǵarǵy sot, Іshki ister mınıstrligi jáne Bas prokýratýra referendým naýqany kezinde joldanǵan ótinishterge qatysty aqparat berdi. Olardyń málimetinshe, osy ýaqyt aralyǵynda zań buzýdyń sanaýly ǵana derekteri tirkelgen. 24 adam respýblıkalyq referendýmǵa qatysty saýalnama júrgizý tártibin saqtamaǵany úshin ákimshilik jaýapkershilikke tartyldy. Qylmystyq ister qozǵalǵan joq. Іshki ister mınıstrligi referendýmǵa qatysty bir ǵana quqyq buzý deregin, ıaǵnı resmı derektersiz únparaqtar taratylǵanyn habarlady», - dedi L. Anfımov QR Ortalyq saılaý komıssııasynda ótken brıfıngide. 

Onyń aıtýynsha, QR OSK-ǵa negizinen anyqtamalyq-aqparattyq sıpattaǵy 66 ótinish, saýal jáne usynys kelip tústi. Olar zańda belgilengen merzimde qaralyp, ótinish bergen adamdarǵa tıisti jaýap berildi.

«Qazaqstanda referendýmdy daıyndaý jáne ótkizý barysynda zań buzý oqıǵalaryna dereý áreket etý úshin qajet jaǵdaılar jasaldy. 2024 jylǵy 6 qazandaǵy referendým kúni TMD baıqaýshylary Qazaqstannyń 9 óńirinde – Aqmola, Shyǵys Qazaqstan, Batys Qazaqstan, Qaraǵandy, Mańǵystaý, Túrkistan oblystarynda, sondaı-aq Astana, Almaty jáne Shymkent qalalarynda qyzmetin júzege asyryp, 618 daýys berý ýchaskesine bardy. Olar daýys berý protsesiniń ashyqtyǵy qamtamasyz etilgenin málimdedi. Men ózim 10-nan astam ýchaskege bardym jáne referendým ótkizý jaqsy uıymdastyrylǵanyna kóz jetkizdim», - dedi Leonıd Anfımov.
Budan buryn habarlanǵandaı, búgin Ortalyq referendým komıssııasy daýys berýdiń aldyn ala qorytyndysyn shyǵardy. 

Osy rette saılaý ýchaskelerine barǵan qazaqstandyqtardyń 71,12 paıyzy referendýmda AES qurylysyn qoldap daýys bergeni aıtyldy.